Ўзбекистон ҳамда Таиланд учрашувидан сўнг матбуот анжумани ўтказилди. Унинг иккинчи қисмида Ўзбекистон миллий терма жамоаси бош мураббийи Сречко Катанец иштирок этиб, журналистларинг саволларига жавоб қайтарди.

"Бугун жамоам жуда ҳам яхши ўйин кўрсатди, бунинг учун футболчилардан миннатдорман. Тўғри, бизда ўртоқлик ўйинларида ҳам яхши ўйин ва яхши натижалар бўлган эди. Лекин айнан бугун мен жамоам кўрсатган ўйинидан тўлиқ қониқдим. Биз яхши прессинг қилдик, учрашув давомида темпни ушлаб турдик, футболчилар максимал даражада тартибли ўйин намойиш этишди.

Осиё кубогигача ФИФА кунларидан унумли фойдаланиб, кучли рақиблар билан ўйин ўтказишга ҳаракат қиламиз.

Жалолиддин Машарипов алмаштирилганидан сўнг бироз норози бўлди, бу нормал ҳолат. Ҳар бир футболчи кўпроқ ўйнашни хоҳлайди. Ўзим ҳам футболчилик давримда кўпинча шундай қилардим. Ҳаммани характери ҳар хил. Мен уни ҳам тушунаман. Лекин мен мураббийман, баъзида ўйинга ўзгартириш киритиш учун лидерларни ҳам, хусусан, Машарипов ёки Шомуродовни ҳам алмаштиришга мажбурман. Бунда ҳеч қандай муаммо йўқ.

Биз 4-4-2 схемасини рақибга қараб танладик. Ҳар бир рақибга қараб бу жойлашув ўзгариб бориши мумкин", — деди Катанец.