Superliga 12-turidan o‘rin olgan “Qizilqum” — “Paxtakor” uchrashuvi 23 iyun kuni bo‘lib o‘tadi.
O‘zbekiston U23 terma jamoasi Osiyo chempionatining final uchrashuvida ishtirok etadi. Mazkur o‘yinda bosh murabbiy Timur Kapadze “Paxtakor” futbol klubining uch nafar a’zosi xizmatidan foydalanishi mumkin: Hojimat Erkinov, Abbosbek Fayzullayev, Diyor Xolmatov. Reglamentga ko‘ra, milliy va olimpiya termasiga uch va undan ortiq futbolchisini taqdim etgan klubda rasmiy uchrashuv sanasini o‘zgartirishni so‘rab murojaat qilish huquqi mavjud. “Paxtakor” ayni vaqtda mana shu huquqdan foydalanadi.
Avvalroq “Paxtakor” Osiyo chempionati U23 startiga qadar bo‘lgan “So‘g‘diyona”ga qarshi bellashuvni ham boshqa muddatga qoldirishni so‘rab murojaat qilgan, ammo bunda qit’a chempionatidan keyingi bahs borasida gap bo‘lmagandi. Biroq Namanganda bo‘lib o‘tgan Osiyo kubogining saralash o‘yini uchun ham “paxtakorchilar”ning 5 nafar futbolchisi jalb qilingandi: Farrux Sayfiyev, Odil Hamrobekov, Aziz Turg‘unboyev, Hojiakbar Alijonov, Sardor Sobirxo‘jayev. Mazkur futbolchilarning ayrimlarida kichik jarohatlar borligidan kelib chiqib, “Paxtakor”ga olimpiya termasiga jalb qilingan futbolchilar xizmati ham zarur.
O‘zbekiston Professional futbol ligasi mana shunday holat katta ehtimol bilan yuz berishini hisobga olgan holda “Qizilqum” va “Paxtakor” o‘yinini bir necha kunga surish taqvimga katta ta’sir qilmasligi masalasini avvaldan rejalashtirgandi. Afsuski, “Olimpik” futbol klubi ketma-ket ikki turni o‘tkazib yuborganidan kelib chiqib, uning navbatdagi o‘yinlarini kechiktirish imkoniyati mavjud emas. Qolaversa, “So‘g‘diyona” futbol klubining OFK kubogiga jo‘nab ketayotgani ham taqvim tuzishda inobatga olinganini unutmaslik kerak.
