«Barsa» Pikeni zaxira o‘rindig‘iga qo‘yishga tayyor, futbolchi maoshining yana qisqarishiga rozi bo‘ladi.

Ehtimoliy almashtirishlar - Kunde yoki Kulibali.

Ispaniyada jurnalistlar Jerar Pikening «Barsa» prezidenti Joan Laporta bilan uchrashgani haqida yozishmoqda - suhbat juda qizg‘in bo‘lgan. «Agar qo‘lingizdan kelsa, «Barsa»ga dunyoning eng yaxshi himoyachisini olib keling. Ko‘ramiz, u menga o‘rinbosar bo‘la olar ekanmi?», - deya o‘ziga ishonch bildiradi Jerar rahbariyatga qarata.

Jurnalist Xavi Uolls qo‘shimcha tafsilotlarni bayon qildi: Pike prezidentga faqat futbolga e’tibor qaratishini aytdi. U klub bilan shartnomasi tugaguniga qadar keyingi ikki yil davomida ortiqcha biznes ishlarini to‘xtatadi. Jerar o‘zini «Barselona»ning asosiy himoyachisi sifatida ko‘rishini aytgan. Pikega ayni dam katta maosh to‘lanadi. «Barsa» esa uni imkon qadar pasaytirib, Jerarni zaxira o‘rindig‘iga mixlamoqchi.

Darhaqiqat, Jerar «Barsa»ga juda qimmatga tushmoqda. Uning dastlabki shartnomasida 12 million yevro maosh ko‘rsatilgan edi - bu jamoadagi eng katta summalardan biri. Ammo o‘tgan yili Pike rahbariyatga yon berishga majbur bo‘ldi va klubga yangi kelganlar bilan shartnoma imzolashda yordam bo‘lishi uchun maoshning bir qismini qisqartirdi. Inqiroz paytida bu 5 milliongacha qisqardi. Jerarning qolgan pullari 2023 yilning yozida to‘lab beriladigan bo‘ldi: insayder Luis Roxoning aytishicha, taxminan 40 million yevro allaqachon to‘lab bo‘lingan. Pikening 2024 yilgacha amal qiladigan shartnomasida sodiqlik uchun bonuslar (7,5 million yevro) va o‘yinlar foizi (3,3 million) ko‘zda tutilgan edi. Ular ispaniyalik 2022/23 yilgi mavsumdagi o‘yinlarning umumiy 40 foizida qatnashsagina faollashadi.

Ammo ayni dam «Barsa» Pikeni bunday pulga arzimaydi, deb hisoblamoqda. Bu esa uni zaxira o‘rindig‘iga olib boradi. Ishonchli insayder Fernando Poloning yozishicha, Xavi himoyachining jarohatidan qo‘rqadi (u 2021/22 yilgi mavsumda 85 kunini kasalxonada o‘tkazgan). Pike esa aksincha bazada o‘ynashni xohlaydi va raqobatga tayyor. Bundan tashqari, moliyaviy muammolar ham bor. Klub hali inqirozdan chiqmagan, shuning uchun Pike va boshqa faxriylar Jordi Alba, Serxi Buskets va Serj Robertodan maoshlarini qisqarishini so‘ragan. Ular bu borada hali ham qiyinchiliklar borligini yozishdi, ammo Laporta va Xavi bilan suhbatdan so‘ng Jerar biroz yumshoqroq pozisiyaga o‘tdi.

Buni «Barsa»ning moliyaviy masalalar bo‘yicha vise-prezidenti Eduard Romeu ham bilvosita tasdiqladi: «Jerar bilan juda yaqin munosabatdaman. Pike har doim biz bilan hamkorlik qilgan va ishonchim komilki, u buni yana davom ettiradi. U klubdagi vaziyatni tushunishiga ishonaman».

Jerar - futbolchilar orasida asosiy biznesmen. Oxirgi 12 yil davomida u bu faoliyati tizimini borgan sari kengaytirib kelmoqda. Pike ESADE Kataloniya biznes maktabida iqtisod bo‘yicha tahsil olgan, keyin esa o‘z bilimlarini amalda qo‘llagan - Kosmos xoldingiga asos solgan (futbol va tennis tashabbuslarini o‘z ichiga oladi). Jerarning asosiy biznesi 2017 yilda Kosmos Holdingga asos solgan payti boshlangan. Bu tizimda 3 asosiy yo‘nalish: futbol, ​​tennis va OAV parallel tarzda rivojlantirilmoqda. Birinchi yirik loyiha - bu Antuan Grizmanning ta’sirchan fikrlari va uning «Atletiko»da qolish qarori haqidagi hujjatli film. 2018 yil boshida Pike mutlaqo yangi biznesga qo‘l urdi. Uning kompaniyasi tennis bo‘yicha Devis kubogining asosiy investoriga aylandi. Pike 23 yoshidan boshlab ushbu turnirni o‘zgartirib, uni futbol bo‘yicha jahon chempionatining analogiga aylantirishni orzu qilgan. “Men u yerda kuni bo‘yi ishlayman. Bu mening yirik loyiham va menimcha, biz to‘g‘ri yo‘ldamiz. Agar orzuingiz bo‘lsa, u uchun kurashishingiz kerak", - deydi Pike.

«Barsa» Pikening o‘rniga qaysi himoyachini olib kelmoqchi?

Asosiy variant - Kalidu Kulibali. Senegallik futbolchi «Napoli»ning yangi shartnoma taklifini rad etdi, shu bois u boshqa klublar taklifini ko‘rib chiqmoqda. Corrierre dello Sport xabariga ko‘ra, «Chelsi» va «PSJ» hamon himoyachini kuzatishmoqda, ammo kataloniyaliklarning qiziqishi bu yo‘lda muhim rol o‘ynashi mumkin. Nashrning aniqlik kiritishicha, Kulibali uchun jamoa kamida 40 million yevro so‘ragan, hozirgi «Barsa» uchun bu juda munosib narx. Undan oshig‘i ortiqcha albatta.

Shuningdek, matbuotda Jyul Kundening nomi ham yangramoqda. Mundo Deportivo himoyachining «Barselona»ga o‘tishni xohlayotgani, ammo klubning moliyaviy ahvoli bunga yo‘l bermasligini yozmoqda. «Barsa»ning boyvachcha raqobatbatchilari oldida qo‘li kaltaroq - «Chelsi» yoki «Nyukasl» bu borada asosiy favorit. Kataloniyaliklar Jyulning narxi 65-70 million yevro ekanligini bilishadi, ammo ular «Sevilya»ni o‘z talablarini pasaytirishiga harakat qilishadi. Kelishuvga Serjinyo Dest yoki Fransisko Trinkau transferlari kiritilishi mumkin.