«Chelsi» va Ispaniya terma jamoasi darvozaboni 27 yoshli Kepa Arrisabalaga ijara asosida «Nissa»ga o‘tishi mumkin. Bu haqda Footmercato xabar bermoqda.
Manbaga ko‘ra, «Nissa» sobiq darvozabon Valter Benites «PSV»ga ketganidan so‘ng yangi sifatli darvozabon sotib olishga qiziqish bildirgan.
«Nissa» 2021/2022 yilgi mavsumda «PSJ»dan ijaraga olingan jamoaning asosiy darvozaboni Marsin Bulkani sotib olish huquqini faollashtirdi. Endilikda klub ikkinchi darvozabon izlamoqda va Kepa nomzodini jiddiy ko‘rib chiqadi.
«Chelsi» Kepani 2018 yilning yozida Bilbaoning «Atletik» klubidan 80 million yevro evaziga sotib olgan edi.
