Shu kunlarda Qirg‘iziston poytaxti Bishkek shahri erkin, yunon-rum va ayollar kurashi bo‘yicha o‘smirlar (U 17) hamda yoshlar (U 23) o‘rtasidagi Osiyo chempionatiga mezbonlik qilyapti.

Ayni daqiqalarda yunon-rum kurashi bo‘yicha final bellashuvlari o‘tkazilmoqda va e’tiborga molik jihati, Toyloq olimpiya va paralimpiya zaxiralari kollejining 9-sinf o‘quvchisi Shahzod Ro‘zioxunov Osiyo chempionligini qo‘lga kiritdi. 45 kg vazn toifasidagi yunon-rum kurashchimiz hal qiluvchi final uchrashuvida eronlik Farzad Balutakiyni so‘nggi usul evaziga mag‘lub etib, oltin medalga ega chiqdi.

Valijon Jonxo‘rozov va Farrux Usmonovning shogirdi hisoblangan Shahzod finalga qadar Janubiy koreyalik Xan Ujin (8-0), yaponiyalik Tayga Kishida (6-0), qozog‘istonlik Shingizxan Abdixalimov (3-2)ni mag‘lub eta oldi. Faqat uchinchi davrada finaldagi eronlik raqibiga yutqazib qo‘ygandi. Oltin medal uchun kechgan bellashuvda o‘sha mag‘lubiyat alamini chiroyli tarzda olishni uddaladi.

Biz yosh sportchimizni ushbu ajoyib g‘alaba bilan tabriklaymiz.