Шу кунларда Қирғизистон пойтахти Бишкек шаҳри эркин, юнон-рум ва аёллар кураши бўйича ўсмирлар (U 17) ҳамда ёшлар (U 23) ўртасидаги Осиё чемпионатига мезбонлик қиляпти.

Айни дақиқаларда юнон-рум кураши бўйича финал беллашувлари ўтказилмоқда ва эътиборга молик жиҳати, Тойлоқ олимпия ва паралимпия захиралари коллежининг 9-синф ўқувчиси Шаҳзод Рўзиохунов Осиё чемпионлигини қўлга киритди. 45 кг вазн тоифасидаги юнон-рум курашчимиз ҳал қилувчи финал учрашувида эронлик Фарзад Балутакийни сўнгги усул эвазига мағлуб этиб, олтин медалга эга чиқди.

Валижон Жонхўрозов ва Фаррух Усмоновнинг шогирди ҳисобланган Шаҳзод финалга қадар Жанубий кореялик Хан Ужин (8-0), япониялик Тайга Кишида (6-0), қозоғистонлик Шингизхан Абдихалимов (3-2)ни мағлуб эта олди. Фақат учинчи даврада финалдаги эронлик рақибига ютқазиб қўйганди. Олтин медаль учун кечган беллашувда ўша мағлубият аламини чиройли тарзда олишни уддалади.

Биз ёш спортчимизни ушбу ажойиб ғалаба билан табриклаймиз.