Pro-Liga 13-turi doirasida 23 iyun kuni bo‘lib o‘tgan «Xorazm» va «Mash’al» jamoalari o‘rtasidagi uchrashuvda (1:1) bahsli holat kuzatildi.

Uchrashuvning 81-daqiqasida mezbonlar tashkil etgan hujumdan keyin Temur Bekjanov darvozani ishg‘ol qilib, hisobni 1:1 ko‘rinishiga keltirdi. Uchrashuv bosh hakami Doston Rahmonov gol bo‘lganini qayd etib, maydon markazini ko‘rsatdi. O‘z navbatida bu qarorga yon hakam ham e’tiroz bildirmadi.

Goldan keyin «Mash’al» futbolchilari bosh hakamga, murabbiylar shtabi esa yon hakam Aleksandr Burovga keskin e’tiroz bildirdi. Ushbu e’tirozlardan keyin bosh hakam yordamchisi bilan maslahatlashdi va golni bekor qildi. Qayd etish kerak, uchrashuvda VAR tizimi yo‘q edi.

O‘z navbatida hakamning bahsli qarori «Xorazm» futbolchilari va murabbiylar shtabining keskin reaksiyasiga sabab bo‘ldi. Futbolchilar avvaliga bosh hakam, keyinchalik laynsmendan holatga izoh talab qildi.

Shuningdek, «Xorazm» murabbiylari yon hakamga keskin e’tiroz bildirayotgan vaqtda ikki jamoa vakillari o‘rtasida ommaviy tortishuv yuzaga keldi. Tortishuvli holat sakkiz daqiqa davom etdi. Yakunda hakamlar o‘z qarorini o‘zgartirmadi, gol inobatga olinmadi.

«Xorazm» ikkinchi bo‘limga qo‘shib berilgan vaqtning 9-daqiqasida gol urdi va o‘yin 1:1 hisobi bilan yakunlandi.