Marko Asensio Millatlar ligasi 3-tur doirasidagi Shvesiyaga qarshi o‘yindan ikki kun oldin jurnalistlar savollariga javob berarkan, «Real»dagi kelajagi borasida ham gapirdi.
- Harakatlaringizda barqarorlik yo‘qligi muntazam o‘yin vaqti kamligi bilan bog‘liqmi?
- Kelgusi bir necha yil ichida menga kerak bo‘lgan narsa - bu barqarorlik. O‘zimga ishonch va muntazam o‘yin amaliyoti men uchun muhim. «Real»dagi mavsumim davomida ular menda bor edi. Aynan shu narsa kerak.
- Luis Enrikening aytishicha, terma jamoaga chaqirilganingizdan hayratda qolibsiz.
- Men doim Ispaniya terma jamoasida o‘ynashga qodirman, deb o‘ylaganman va bu yerda ekanligimdan xursandman. Muhit yaxshi, atrofda do‘stlarimning borligi huzur bag‘ishlaydi. Shu bilan birga, eng yuqori darajada ishlashim kerak.
- Ispaniya futbol federasiyasi atrofidagi shov-shuv sizga ta’sir qiladimi?
- Tashqi suhbatlar haqida hech narsa bilmayman. Oxirgi paytlarda sevgan qizimning qo‘lini so‘rashga tayyorgarlik ko‘rish bilan bandman. Demak, mavzudan biroz chetdaman. Natija bo‘lishi uchun asosiy e’tiborimni terma jamoadagi vazifalarga qarataman.
— 24ta o‘yinda 12ta gol urdingiz. Sizningcha, «Real»da ko‘proq o‘yin vaqtiga ega bo‘la olasizmi? Kelajagingiz qachon ma’lum bo‘ladi?
- Ayni payt bor e’tiborimni terma jamoaga qaratganman, bosqich yakunlangach, gaplashamiz.
- Madridliklar shartnomangizni uzaytiradimi yoki hech vaqosiz qolmaslik uchun sizni sotadimi?
- Aslida uchinchi variant ham bor: jamoada qolib, shartnoma bo‘yicha yilni tugatib qo‘yishim mumkin...
- Sizga kimning metodikasi ko‘proq yoqadi: Karlo Anchelottimi yoki Luis Enrike?
- Ikkalasi ham yoqadi. Karlo tajribali, dono odam. Luis Enrike - juda yaxshi murabbiy, u ko‘p narsaga erishdi, o‘yinchilarga energiya uzatishni biladi.
- Jezus va Gnabri ismlari «Real» bilan bog‘lanayotgani sizni bezovta qilyaptimi?
- Axir mish-mishlar futbolning bir qismi. Biz allaqachon o‘rganib qolganmiz.
MUHAMMADXON tayyorladi
