"Tottenxem"ning yangi futbolchisi Risharlison jamoaning 2022/23 yilgi mavsumdagi ilk rasmiy o‘yinini o‘tkazib yuboradi.
Angliya futbol assosiasiyasi 25 yoshli braziliyalikni bir o‘yinga diskvalifikasiya qildi.
Angliya chempionatining 35-turidan o‘rin olgan “Everton” – “Chelsi” (1:0) uchrashuvi vaqtida muxlislar Risharlisonning golidan so‘ng maydonga pirotexnika mahsulotlarini uloqtirishdi. Forvard qo‘liga tutunli bombalardan birini olib, yana muxlislarga tashladi.
Hujumchi diskvalifikasiyadan tashqari, no’maqbul xatti-harakati uchun 25 000 funt sterling miqdorida jarimaga tortildi.
Risharlison 1 iyul kuni 58 million yevro evaziga "Everton"dan "Tottenxem"ga o‘tgan edi.
"Tottenxem"ning 2022/23 yilgi mavsumdagi ilk o‘yini 6 avgust kuni bo‘lib o‘tadi - shu kuni "shporlar" APL 1-turi doirasida o‘z maydonida "Sautgempton"ni qabul qiladi.