Birinchi davraning qoldirilgan uchrashuvlari bo‘lib o‘tgandan so‘ng Bekobodning “Metallurg” jamoasiga ham qisqa muddatli ta’til berildi. Futbolchilar, murabbiylar Qurbon Hayiti bayramini o‘z uylarida, oilasi, ota-onasi hamda farzandlari davrasida o‘tkazgach, Bekobodda jamlanishadi. Ikkinchi davra tadorigi klubning o‘quv-mashg‘ulot maskanida olib boriladi. Quyida jamoa a’zolarining birinchi davradagi ishtiroki sarhisobi bilan tanishing. Ularning jamoa natijalariga qo‘shgan ulushlarini tahlil eting.

Maydonga tushmaganlar
2022 yilgi mavsumning birinchi davrasida “Metallurg” murabbiylari shtabi 22 nafar futbolchining xizmatidan foydalandi. Yoshi katta o‘yinchilardan faqat ikki nafariga – darvozabon Vladimir Vagin hamda yarim himoyachi Jasur Ashurovga maydonga tushish imkoniyati taqdim etilmadi.

Eng ko‘p o‘ynaganlar
“Metallurg” tarkibida birinchi davraning barcha uchrashuvlarida maydonga tushgan futbolchilar uch nafar bo‘ldi. Bular – Abrorbek Toshqo‘ziyev, Damir Temirov hamda Zabixillo O‘rinboyevlardir. Abbos otaxonov hamda Xudoyshukur Sattorovlarga murabbiylar shtabi 12 tadan, Farrux Ibrohimovga 11 ta, Ixtiyor Toshpo‘latov, Shahzodbek G‘ofurbekov hamda Ixtiyor Toshpo‘latovlarga 10 martadan maydonga tushish imkoniyatini berishdi.

Maydonda eng ko‘p vaqt to‘p surgan futbolchi Abrorbek Toshqo‘ziyev bo‘ldi – 1128 daqiqa. Keyingi o‘rinlarda Damir Temirov – 1023, Zabixillo O‘rinboyev – 965, Aleksandr Lobanov – 945 bo‘lishdi.

Eng ko‘p urgan futbolchi
“Metallurg” Superligada eng kam to‘p kiritgan jamoa bo‘ldi – 7 ta gol. “Metallurg” to‘purari esa Damir Temirov bo‘lib turibdi – 3 ta gol.  Xudoyshukur Sattorov, Shohnazar Norbekov hamda Abrorbek Toshqo‘ziyevlar esa o‘z hisoblariga bittadan gol yozdirib qo‘yishgan. Gollardan yana biri avtogol – muallifi Samarqandning “Dinamo” himoyachisi Jasur Jumayevdir.

Eng ko‘p ogohlantirish olgan futbolchi
Farhodbek Bekmurodov birinchi davrada “Metallurg” tarkibida eng ko‘p sariq kartochka olgan futbolchi bo‘ldi – 4 ta. Yana 8 nafar o‘yinchimizda 3 tadan ogohlantirish bor va ularning har biri yana bir marta sariq kartochka bilan jazolanadigan bo‘lsa, keyingi o‘yinda maydonga tusha olishmaydi.

Qizil kartochka olgan futbolchi
Faqat bitta o‘yinchimizga hakam qizil kartochka ko‘rsatdi. U ham bo‘lsa jamoani birinchi davra tugamasidan tark etgan Shohnazar Norbekov bo‘ldi. Shohnazar “Bunyodkor”ga qarshi safar uchrashuvida hakamdan eng og‘ir jazoga tortilgandi.