“Napoli” himoyachisi Kalidu Kulibali Neapol klubi muxlislari bilan xayrlashdi.

“2014 yil 1 iyun – unutilmas sana: Neapolga kelishim va samimiy sevgining boshlanishi. G‘alaba, mag‘lubiyat, quvonch va umidsizlik. Birgalikda boshdan kechirgan juda ko‘p hissiyotlar.

Ikki o‘g‘lim Neapolda tug‘ilgan. Men hayotimning bir bo‘lagiga abadiy aylanib ketadigan odamlarni uchratdim va ular tufayli men va oilam o‘zimizni uydagidek his qildim: birinchi kundan oxirgi kungacha.

Menga ko‘rsatgan sevgingiz uchun neapolliklarga rahmat”, — deb yozdi Kulibali ijtimoiy tarmoqdagi o‘z sahifasida.

8 mavsum davomida Kulibali “Napoli” safida 317 ta o‘yinda maydonga tushib, 14 ta gol urdi va 8 ta golli uzatmani amalga oshirdi.

Yaqin orada 31 yoshli senegallik futbolchi "Chelsi"ga o‘tishni rasmiylashtiradi. Xabar qilinishicha, bitim summasi 40 million yevroni tashkil qiladi. Futbolchi 2027 yilgacha shartnoma imzolaydi.