PFL bosh direktori Diyor Imomxo‘jayev «Neftchi» yangi bosh murabbiyi Vitaliy Levchenkoning tegishli lisenziyasi yo‘qligi va Farg‘ona klubining boshqa jamoalar oldidagi qarzdorligi haqida ma’lum qildi.

«Vitaliy Levchenkoni ham inson, ham mutaxassis sifatida hurmat qilganimiz holda aytamizki, unda Pro lisenziyasi mavjud emas. Bunday holatda u Superliga klubini boshqara olmaydi.

Levchenko de fakto «Istiqlol» klubi bilan Chempionlar ligasida ajoyib natija qayd etgan bo‘lsa-da, de yure OFK ro‘yxatidan Mubin Ergashev bosh murabbiy sifatida ro‘yxatdan o‘tkazilgan. Shundan kelib chiqilsa, «Neftchi» Pro lisenziyasi mavjud yana biror mutaxassis topishi kerak bo‘ladi.

«Neftchi» qarzlari haqida ma’lumot bergandik. Hozirgacha klub «Paxtakor»dan qarzlarining 45 foizi hamda «Mash’al»dan qolib kelayotgan qarzning 70 foizidan qutilgan. Holat ijobiy tarafga o‘zgarmoqda. Biroq bu hali hammasi emas. 29 iyulgacha qator masalalar hal qilinishi kerak.

Afsuski, bizda biror rahbar klubni qiyin holatga solib ketyapti, keyingi rahbar esa vaqtini eski rahbariyatdan qolgan muammolarni bartaraf etishga ketkazyapti», - deya yozadi PFL direktori telegramdagi kanalida.

Eslatib o‘tamiz, «Neftchi» Superliga 1-davrasidan keyin Ilhom Mo‘minjonovni iste’foga chiqarib, tojikistonlik Vitaliy Levchenkoni bosh murabbiy etib tayinladi. Klub rahbariyatida ham o‘zgarishlar kuzatilgandi.