Davralar oralig‘ida yuzaga kelgan tanaffusdan unumli foydalanish, futbolchilarning jismoniy holatlarini saqlab turish, shuningdek, tarkibga yangi qo‘shilgan o‘yinchilarni sinovdan o‘tkazish maqsadida, bugun “Navbahor” Tojikistonning 10 karra va amaldagi chempioni, joriy yilgi Osiyo Chempionlar Ligasi (OCHL)ning guruh bahslarini muvaffaqiyatli tarzda o‘tkazib, mazkur musobaqaning nimchorak finaliga yo‘l olgan, Dushanbening “Istiqlol” jamoasiga qarshi nazorat-sinov bahsi o‘tkazdi.
Namangan shahridagi “Markaziy” stadioni, 8 mingdan ziyod muxlis ko‘z o‘ngida bo‘lib o‘tgan ushbu o‘yin teng kurashlar ostida kechdi.
Dushanbeliklar “lochinlar”ga munosib qarshilik ko‘rsata olishdi.
O‘yin borasida to‘xtaladigan bo‘lsak, uchrashuvning 27-daqiqasida Jamshid Iskanderovning chap qanotdan jarima maydonchasi ichiga oshirgan to‘pini jamoamizning yangi a’zosi Diyorjon Turopov darvozaga aniq yo‘llab, hisobni ochdi – 1:0.
Oradan 2 daqiqa o‘tar-o‘tmas, dushanbeliklarning qarshi hujumi vaqtida “lochinlar” darvozaboni O‘tkir Yusupov raqib futbolchisi bilan yakkama – yakka vaziyatda unga nisbatan qo‘pollik ishlatishga majbur bo‘ldi.
Natijada uchrashuv bosh hakami Ibrohim Ismoilov jamoamiz darvozasiga 11 metrli jarima zarbasi belgiladi. Penaltini “Istiqlol” sardori Manuchehr Jalilov aniq amalga oshirib, hisobni tenglashtirdi – 1:1.
Natijada jamoalar tanaffusga 1:1 hisobidagi durang bilan chiqib ketdi.
Uchrashuvning 2-bo‘limida "lochinlar"ning gruziyalik yarim himoyachisi Elguja Grigalashvili, shuningdek, serbiyalik himoyachi Boyan Sigerning darvozaga bosh bilan yo‘naltirgan hamda Jamshid Boltaboyevning zarbalariga aniqlik yetishmadi.
Mehmonlarning qarshi hujumlaridan birida namanganliklar posboni O‘tkir Yusupov xavfni bartaraf etgan bo‘lsa, yana bir – ikki vaziyatda raqib futbolchilarining zarbalari noaniq ko‘rinish oldi.
Natijada o‘yinda jangovar durang – 1:1 hisobi qayd etildi.
“Navbahor” – “Istiqlol” – 1:1 (1:1)
Gollar: Diyorjon Turopov (27) - Manuchehr Jalilov (29-pen.).
Namangan. “Markaziy” stadioni. 8515 tomoshabin.
Hakamlar: Ibrohim Ismoilov, Islomjon Nosirov, Boburjon Ibragimov, Muzaffar Mamatxanov.
