"Arsenal" texnik direktori Edu Gaspar klubning transfer bozoridagi ishlari haqida fikr bildirdi.
Bu yozda "kanonirlar" yangi o‘yinchilar uchun 140 million yevrodan ko‘proq sarmoya kiritdilar, bu Angliya Premer-ligasidagi klublar orasida eng ko‘p. Biroq Gaspar klubning bozordagi ishlarini yakunlangan deb hisoblamaydi: "Bizda hali qiladigan ishlar ko‘p. Hozir transfer oynasining o‘rtasi va u yopilguncha hamma narsa sodir bo‘lishi mumkin. Biz har qanday vaziyatga tayyormiz. Oldimizda yangi imkoniyatlar ochilishi mumkin”, - deya braziliyalikning so‘zlarini keltiradi jurnalist Fabrisio Romano.
Eslatib o‘tamiz, iyul oyi boshidan buyon "Arsenal" safiga Gabriel Jezus, Aleksandr Zinchenko, Fabio Viyeyra, Mett Tyorner va Markinyos kelib qo‘shildi.
