"Manchester Yunayted" Krishtianu Ronaldudan izoh kutmoqda.
Manchester Evening News nashrining yozishicha, klub portugaliyalikdan mavsumoldi mashg‘ulotlarni boshlash uchun "MYU"ga qachon qaytishni rejalashtirayotgani haqida xabar berishini so‘ramoqda.
Kecha "Manchester Yunayted" Tailand va Avstraliya bo‘ylab mavsumoldi turnesini yakunladi va "Aston Villa" (2:2) bilan o‘yindan so‘ng darhol Manchesterga qaytdi.
Murabbiy Erik ten Xag dushanba kuni futbolchilarga dam berdi, seshanba kuni esa jamoa mavsumga tayyorgarlikni davom ettiradi. Klub Osloda "Atletiko", shuningdek, "Old Trafford"da "Rayo Valyekano" bilan o‘rtoqlik o‘yinlari o‘tkazadi.
Ronaldu 4 iyul kuni ta’tildan so‘ng "Manchester Yunayted"ga qaytishi kutilgandi, ammo hujumchi Portugaliyada qolgan holda jamoa bazasiga kelmadi.