"Andijon" o‘rtoqlik uchrashuvida "Qizilqum"ni 3:2 hisobida mag‘lubiyatga uchratdi. Ushbu bahsdan so‘ng andijonliklar bosh murabbiyi Viktor Kumikov o‘z fikrlarini bildirdi.

“Mazkur nazorat uchrashuvida birinchi navbatda o‘yin amaliyotiga ega bo‘lish uchun barchaga o‘ynash imkoniyatini berdik. Vazifani to‘liq bajardik. G‘alabaga bo‘lgan hissiyotimiz bizga yutuq olib keldi.

“Qizilqum” haqida gapiradigan bo‘lsam, Superliga jamoasi o‘z oldiga sovrindor bo‘lishni maqsad qilgan. Yaxshi raqib. Ajoyib o‘yin ko‘rsatishdi. Faqat biz yuzaga keltirgan imkoniyatlardan foydalandik.

Seleksiya ishlaridagi rejalarimiz xususida gapirsam, agar bizning futbolchilarimizdan yuqori saviyadagi ijrochi bo‘lsa, taklif qilamiz. Shunchaki, oddiy o‘yinchilarni olmaymiz. Hozircha Suhrob Berdiyev jamoamiz a’zosiga aylandi”, - dedi Kumikov.