“Atalanta”ning argentinalik himoyachisi Xose Palomino doping-testdan o‘ta olmadi, deb xabar bermoqda Italiya klubi matbuot xizmati.

Futbolchining qonida anabolik steroid bo‘lgan nandrolon topildi. Bergamoliklar xabariga ko‘ra, antidoping agentligi futbolchini diskvalifikasiya qilgan. Taqiq muddati hozircha oshkor etilmagan.

32 yoshli himoyachi Italiya chempionatining o‘tgan mavsumida “Atalanta” safida 34 ta o‘yinda maydonga tushdi. Tajribali futbolchi bitta gol urdi va 9 marta sariq kartochka oldi. Himoyachining Bergamo klubi bilan amaldagi shartnomasi kelasi yilning iyun oyi oxirigacha mo‘ljallangan.

Palomino 7,5 million yevroga baholangan.