"Barselona" hujumchi Martin Breytueytni jamoani tark etishga ko‘ndirishda davom etmoqda, deb xabar bermoqda Marca nashri.

Manbaga ko‘ra, "ko‘k-anorranglilar" hujumchilar o‘yinchilar sonini kamaytirishga harakat qilmoqda va 31 yoshli daniyalik futbolchi bilan hamkorlikni davom ettirishni istamasligi haqida ma’lum qilgan.

Hujumchi AQSHda bo‘lib o‘tgan turnega borgan futbolchilar ro‘yxatiga kiritilmagan va kataloniyaliklar bu vaqt ichida u o‘ziga yangi klub topishini kutishgan.

Biroq, Breytueyt ketishdan bosh tortmoqda, shu jumladan, tekin transferga rozi bo‘lmaydi, chunki u qolgan ikki yil uchun maoshni to‘liq olish niyatida.

Shu bilan birga, Kataloniya klubi qo‘shimcha bosim o‘tkazish imkoniyatini ko‘rib chiqmoqda, biroq futbolchi shikoyat qilishi mumkinligidan xavotirda.

Breytueyt o‘tgan mavsumda “Barselona” safida barcha musobaqalarda 4 ta o‘yinda maydonga tushib, 2 ta gol urdi va bitta golli uzatmani amalga oshirdi. Hujumchining Kataloniya klubi bilan shartnomasi 2024 yilning 30 iyuniga qadar mo‘ljallangan.