"Manchester Yunayted"ning "Man Utd Supporters Trust" fan-klubi "Brentford"ga uchralgan mag‘lubiyatga munosabat bildirdi. Muxlislar jamoasi klub egasi bo‘lmish Gleyzerlarni mas’uliyatli bo‘lishga chaqirgan. Aslida hammasi sharmandali mag‘lubiyatdan ancha oldin boshlangan edi. Kechagi voqeadan keyin esa muxlislar Gleyzerlar oilasini Erik ten Xagga yetarli mablag‘ ajratmaganlik hamda katta transferlarni amalga oshirmaganlikda ayblab chiqdi. Kechagi o‘yin yakuniga yetishi bilan fan-klub ijtimoiy tarmoqlarga quyidagi xabarni joyladi. Unda shunday deyiladi:

"Odatda biz o‘yinlar natijasiga izoh va munosabat bildirmaymiz. Ammo bugungi kutilmagan mag‘lubiyat bizni shunday qilishga majbur qilmoqda. "Brentford"ga qarshi o‘yin sharmandalikdan boshqa narsa emas. Buni tom ma’noda aytayapmiz. Ammo hozir bu narsa hech kimga yangilik bo‘lmay qoldi. Biz bu natijani uzoq yillik samarasiz va mantiqsiz boshqaruv oqibati deb bilamiz. "Man Utd Supporters Trust" klub egalarini, eng avvalo, ushbu muvaffaqiyatcizlikda mas’ul deb hisoblaydi. Ser Aleks Fergyuson ketgandan beri biz ilk bor mana shunday achinarli ahvolga tushdik va bu, klub egalarining olib borgan ishlari hosilasidir. Shu tufayli "Manchester Yunayted"ning butun dunyodagi muxlislar nomidan, biz rahbariyatdan tezkor va keskin choralar ko‘rishni talab qilamiz. Biz muxlislar, bunda hammamiz birlashishimiz kerak. Hozir muxlislar qo‘llovi, jamoaga har qachongidan ham zarurroqdir. Shuni bilib qo‘yishingizni istaymizki, biz muxlislar, doimo, jamoa libosini, futbolchilarni va klubni qo‘llab-quvvatlaymiz. Bugun bizning bayroqlarimiz har qachongidan ham qizilroq. Biz esa hech qachon o‘lmaymiz. Klubimiz yashar ekan, biz ham doimo barhayotmiz!".

"Brentford"ga qarshi bahsdan keyin Erik ten Xagning o‘zi ham jamoaga yangi futbolchilar zarur ekanini tan olgan edi. Endilikda "MYU" "Liverpul"ga qarshi bahsga tayyorgarlik ko‘rishi kerak bo‘ladi.

ISMATOV J.