"Napoli" "Tottenxem" yarim himoyachisi Tanguy Ndombele bilan shartnoma imzolash borasida prinsipial kelishuvga erishdi, deb xabar beradi Sky Sports. Futbolchi Neapol klubiga ijara asosida o‘tadi.
Sky Italia xabariga ko‘ra, 18 avgust kuni 25 yoshli fransuz Italiyada tibbiy ko‘rikdan o‘tadi.
Avvalroq “Napoli” futbolchining ijarasi uchun 1 million yevro to‘lab, maoshning katta qismini o‘z zimmasiga olishi xabar qilingandi. Shuningdek, “Napoli” futbolchini 2023 yilning iyun oyida 30 million yevro evaziga sotib olish huquqiga ega bo‘ladi.
Ndombele tez orada "Napoli"dan "PSJ"ga o‘tadigan Fabian Ruisning o‘rnini egallaydi.
2021/22 yilgi mavsumning ikkinchi yarmida Ndombele “Lion” safida ijara asosida o‘ynadi. U fransuz klubi safida 15 o‘yinda 1 gol va 2 golli uzatmani amalga oshirdi. Transfermarkt.com portali futbolchini 30 million yevroga baholamoqda.