1. David De Xea "Liverpul"ga qarshi
2021-22 yilgi mavsumning eng yaxshi jamoalaridan biri bo‘lgan klub, 3 turda "Manchester Yunayted"ning rutubatga to‘lgan koshonasiga tashrif buyuradi. "MYU" darvozaboni De Xea "Brentford"ga qarshi bahsda yo‘l qo‘ygan xatolari sabab, muxlislardan kechirib so‘ragandi. Endi u o‘z aybini APLning eng dahshatli jamoasi bo‘lgan "Liverpul" bilan o‘yinda yuvishi talab etiladi. Bu bahs De Xeaning jismoniy, aqliy va ruhiy holatini sinovdan o‘tkazadi. Shuningdek, u ten Xagning jamoada qolishini ham belgilab berishi mumkin. Ammo dushanba kuni De Xeaga oson bo‘lmasligi aniq!
2. Gabriel Jezus Markos Senesiga qarshi
Markos Senesi avgust boshida "Feyenoord"dan xarid qilingandi. Himoyachi o‘zining ilk bahsini "Arsenal"ga qarshi o‘tkazishi mumkin. Qarshi tomonda esa 2 turda "Bornmut"ni yakson qilgan (4-0) "shaharliklar"ning sobiq hujumchisi – Gabriel Jezus. Braziliya terma jamoasi a’zosi o‘zining muvaffaqiyatli yurishini davom ettirishga harakat qilishi tabiiy, albatta. Ammo Senesi ham jim qarab turmaydi. Zero, u ham Janubiy Amerika o‘g‘loni. Demak, uchinchi turda, argentinalikka braziliyalik qarshi chiqadi.
3. Devid Moyes Graxam Potterga qarshi
"Vest Xem" hamda "Brayton"ning qarama-qarshiligi nega qiziq bo‘ladi degan savol tug‘ilishi mumkindir. Bunga sodda javob mavjud: chunki ikki jamoa ikki xil uslubga ega. Aslida, ularning murabbiylari shunday. Devid Moyes va Graxam Potterning futbol falsafasi bir-birinikidan tubdan farq qiladi. Har ikki tomonda g‘alaba uchun sabablar yetarli. "Brayton" londonliklarga qarshi so‘nggi 10 ta APL bahsini yutqazmagan. Shu sabab "chag‘alaylar" an’anani davom ettirishga harakat qiladi. "Vest Xem" esa omadsiz seriyaga yakun yasashga...
4. Sven Botman Erling Xolandga qarshi
Uchta ketma-ket bahsni quruq o‘tkazish, "Manchester Siti" uchun "Nyukasl" maydonida oson bo‘lmaydi, albatta. Shuningdek, Eddi Xau o‘z jamoasini o‘sganini aynan mana shu o‘yin ko‘rsatib beradi. Ammo bular keyingi darajadagi omillardir. Qarama-qarshilik Sven-Erling orasida ham kechadi. Niderlandiya terma jamoasi a’zosi Botman, o‘zining tengquri bo‘lgan Xolandni to‘xtatib qolishi kerak. Ha, Xoland juda kuchli, aqlli va tezkor. Ammo Botman ham undan qolishmaydi.
5. Eronson Jorjinyoga qarshi
Jorjinyoning qo‘pol xatosi o‘tgan turda "Chelsi"ga qimmatga tushgandi. Aynan shundan keyin, "Tottenxem" hisobni tenglashtirgan. Italiyalik futbolchi uchinchi turni katta ishtiyoq bilan boshlaydi. Chunki u ham aybini yuvishi lozim. Jessi Marsh esa o‘z shogirdi Eronsonga Jorjinyoni soyadek ta’qib qilishni uqtirgan. Negaki, Jorjinyoga arzimagan maydon berilishi raqibga qimmatga tushadi. Eronson esa bunga qarshi turishi kerak. "Lids" hamda "Chelsi", shuningdek, faqat uch ochko uchun kurashishi ham, bor gap.
ISMATOV J.
