Mavsum avvalida yuqori natijani ko‘zlagan holda, tarkib shakllantirgan «Navbahor» tobora dalillashmoqda.
Jamoaning muvaffaqiyatiga katta hissa qo‘shayotganlar qatorida tajribali Jamshid Boltaboyev alohida ajralib turibdi. U «Navbahor»ning ko‘plab uchrashuvlarida eng yaxshi futbolchi sifatida e’tirof etilmoqda, yana turli nashrlar tomonidan turning ramziy terma jamoasiga kiritilmoqda. Xo‘sh, Jamshid Namanganda o‘zini qanday his qilmoqda?
- Joriy yilgi Superliga «Navbahor» singari o‘zingiz uchun ham ko‘ngildagidek davom etmoqda. Mavsumning ortda qolgan qismidan olgan taassurotlaringiz qanday?
- Hamma ko‘rib-bilib turibdi, Superligada raqobat keskin oshdi, kurash juda qizg‘in. Har holda, har bir jamoa ijobiy natija uchun borini bermoqda. Yengil o‘yinning o‘zi yo‘q. Jamoamiz ishtirokiga kelsak, birinchi davrada 1-2ta o‘yinni hisobga olmasak, butun masofani yaxshi bosib o‘tdik. Mana, hozir 1-o‘rindamiz va Xudo xohlasa, chempionatni shu joyda yakunlaymiz. Buning uchun bor kuchimizni ishga solishimiz tayin.
- Namanganda har qanday kuchli ijrochi ham muxlislar bosimidan ancha qiynalishi turgan gap. Siz esa qisqa fursat ichida jamoa yetakchilari qatoriga kirdingiz. Aytingchi, sizda muxlislar bosimi nechog‘li sezildi?
- Ha, Namanganda muxlislar har doim yuqori natija talab qilishadi - bu tabiiy holat. Umuman, futbolda hamma o‘z ishini qilgani yaxshi. Agar muxlislar chinakamiga qo‘llab-quvvatlashsa, futbolchilar shunga yarasha, ikki chandon harakat qilishadi. Muxlislar bosimi tufayli o‘yin chiqmaganini aytish esa o‘rinsiz. Zero, namanganliklar kabi fidoiy muxlislarni oldin hech qayerda ko‘rmaganman. Ular - toza, haqqoniy futbol tarafdorlari. Shu jonkuyar Namangan aholisi uchun ham bu yil yaxshi natijaga erishishimiz shart. Muxlislarimiz chempionlikni tantana qilishga to‘la haqlilar.
- «So‘g‘diyona»da ham faoliyatingiz bir tekis davom etayotgandi. Qolaversa, yil boshida bu jamoaning OFK kubogida ishtirok etishi ehtimoli katta edi. Shunday holatda «Navbahor»ni tanladingiz. Bunga «Paxtakor»da Samvel Babayan bilan birga ishlaganingiz turtki berdimi yoki boshqa faktorlar ham bor?
- Ha, «So‘g‘diyona»da hammasi yaxshi ketayotgandi. Ammo negadir ich-ichimdan jamoani o‘zgartirishga ehtiyoj sezdim. Shu o‘rinda «So‘g‘diyona» rahbarlariga minnatdorchilik bildirishim joiz. Chunonchi, ular 2 yilcha futboldan chetda qolganimga qaramay, jamoaga chaqirishdi va ishonch bildirishdi. «Navbahor»ni tanlaganimga kelsak, asosiy sababchi Samvel Babayan, albatta. Vyacheslavovichni 8-9 yoshligimdan bilan. U o‘zbek futboliga qanchadan-qancha iqtidorlarni yetkazib bergan chin professional, yana hamisha o‘z oldiga eng yuqori marralarni qo‘yadi.
- Lekin ayrimlarda Samvel Babayanning «Paxtakor» hamda terma jamoamizdagi faoliyati bilan bog‘liq salbiy fikrlar shakllangan...
- Samvel Babayanni yaqindan taniydigan insonlar u haqda faqat iliq fikrlar aytishadi. Ha, hamma «Paxtakor» yoki milliy jamoamizdagi faoliyatini tushunib-tushunmay gapirishi mumkin. Lekin JCH yo‘llanmasini yutishga eng yaqin kelgan murabbiy aynan Babayan ekanligini unutmaslik kerak. Ehtimol, murabbiy hamma qatori qaysidir joyda xato qilgandir, ammo nima uchun ko‘pchilik faqat Babayanga yopishib olmoqda? Keyingi murabbiylar natijasiga qarang. Ismini aytish shart emas, ammo JCH saralashi yakuniy bosqichiga chiqolmagani ham bor-ku...
- «Navbahor» oxirgi 4-5 yildan buyon o‘z oldiga yuqori maqsadlarni qo‘ymoqda. Ammo har safar yakunda nimadir o‘xshamay qolayotgandi. Buni ayrimlar ichki muhit bilan ham bog‘lashdi. «Navbahor»ning bugungi muvaffaqiyatlarida asosiy omil nima, sizningcha?
- «Navbahor»ning avvalgi yillardagi natijasi va ichki muhiti haqida gapirolmayman, chunki jamoa ichida emasdim. Hozir esa aynan ajoyib ichki muhit muvaffaqiyatga zamin yaratmoqda. Yashirmayman, mavsum boshida muhit hozirgidek emasdi va bu natijalarga ham qaysidir ma’noda ta’sir qildi. Vaqt o‘tishi bilan hamma bir maqsad yo‘lida yanada jipslashdi.
- Oldingi chiziqda kuchli ijrochilar borligini his qilib o‘ynash yarim himoyachiga katta ishtiyoq bag‘ishlashi tayin. «Navbahor» davralar oralig‘ida hujumga yangi ijrochilarni jalb etdi. Yangilar haqida nima deya olasiz?
- Ko‘rinib turibdi, tarkibga kuchli futbolchilar qo‘shilishdi. Faqat ularning jamoa o‘yiniga moslashishlari uchun ma’lum vaqt kerak. Davralar oralig‘ida asosan hujum chizig‘iga e’tibor qaratilgani rost. Chunki birinchi davrada bizga gollar kamlik qildi. Buyog‘iga hech qanday bahona ketmaydi.
- Namangan - o‘zbek futboliga kuchli ijrochilarni yetkazib bergan hudud. Agar hozirda boshqa jamoalarda o‘ynayotgan namanganlik yigitlar «Navbahor»da bo‘lishganida, umumiy holat qanchalik o‘zgarardi, sizningcha?
- Shaxsiy fikrimcha, qiyin bo‘lardi. Chunki Namanganda oldinroq akademiyalar uncha yaxshi ishlamagan va buning oqibatida ko‘plab yoshlar oiladan uzoqda shug‘ullanib, katta futbolga qadam qo‘yishgan. Agar akademiyalarni rivojlantirib, zarur sharoitlar yaratib berilsa, nafaqat Namangan, balki barcha viloyatlar ham o‘z jamoasini futbolchilar bilan bemalol ta’minlay oladi. Har holda, bizda iqtidorlar ko‘p.
- Har mavsum avvalidagi yuqori maqsad va yakuniy natija namanganlik muxlislar hafsalasini biroz pir qilgan. Shuni nazarda tutsak, ular bu yil o‘z suyuklilaridan eng yuqori natija kutishga haqlilar. Faqat turnir jadvalidagi zichlik muxlislarni biroz xavotirga solayotgani ham bor gap...
- Ha, turnir jadvaliga qarasak, 5-6ta jamoada chempionlik uchun kurashish imkoniyati bor. Asosiysi, bizda Namangan ahlini quvontirishga qo-dir jamoa bor. Muxlislar bizni doimgidek faol qo‘llab turishsa, bas.
- Sobiq ustozingiz Ulug‘bek Baqoyev Jizzaxda katta nomlarsiz ham raqobatbardosh ja-moa tuzdi. Uning muvaffaqiyati sirini bilasizmi?
- Ulug‘ akaning asosiy siri - futbolchilardan nima xohlashini aniq tushuntirib beradi. U qattiqqo‘llikni o‘z o‘rniga qo‘yadi, lekin joyida siz bilan do‘stday munosabatda bo‘ladi. Deylik, maydondan tashqarida qandaydir muammoga uchrasangiz, befarq qaramaydi. Maydonda esa bor kuchingiz bilan ishlashingizni talab qiladi. Menimcha, Ulug‘bek aka bilan ishlagan har bir futbolchi uning haqida ijobiy fikr bildiradi.
Xurshid YUSUPOV suhbatlashdi
