"Arsenal" hujumchisi Nikolas Pepe "Nissa"ga o‘tishga yaqin turibdi. Jurnalist Fabrisio Romanoning xabar berishicha, klublar futbolchini ijaraga olish borasida kelishuvga erishgan.

27 yoshli futbolchining shartnomasi ikki yildan keyin tugaydi, ammo "kanonirlar" bosh murabbiyi Mikel Arteta vingerni transferga qo‘ydi.

Kot-d'Ivuarlik forvard "kanonirlar" tarixidagi eng yirik transfer bo‘lib qolmoqda, uni klub uch yil oldin "Lill"dan 72 million funt sterlingga olib kelgandi.

Pepe o‘tgan mavsumda barcha turnirlarda 23 ta o‘yinda maydonga tushib, 3 ta gol urdi va 6 ta golli uzatmani amalga oshirdi.