Jizzaxning “So‘g‘diyona” klubi OFK kubogining chorak finaliga qadar yetib keldi. 6 sentyabr kuni Ulug‘bek Baqoyev jamoasi o‘z uyida Honkong klubini qabul qiladi. 

Taqvim tuzilayotgan bir vaqtda O‘zPFL Jizzax klubining chorak finalda ehtimoliy to‘p surishini inobatga olgan. Biroq bu vaqtda milliy terma jamoaning sentyabr oyidagi rejalariga aniqlik kiritilmagani sabab, Coca-cola Superliganing 19-tur uchrashuvlari FIFA sanasigacha taqab qo‘yilmagandi. 

Ma’lumki, milliy terma jamoaning sentyabr oyidagi o‘yinlari sanasi hozirgacha aniq emas. “So‘g‘diyona” esa OFK kubogi sabab zichlik yuzaga kelayotgan taqvimida biroz yengillik olish istagini bildirgan. O‘zPFL vaziyatdan kelib chiqib, xalqaro maydonda O‘zbekiston sharafini himoya qilayotgan jamoa taklifiga rozilik bildirdi. Unga ko‘ra, Jizzax klubining “Neftchi”ga qarshi 16-turdan qolib kelayotgan o‘yini 13 emas, balki 14 sentyabrda bo‘lib o‘tadi. O‘z-o‘zidan chempionatning 19-turidan joy olgan “Metallurg” — “So‘g‘diyona” hamda “Neftchi” — “Dinamo” o‘yinlari 18 sentyabr kuni o‘tkaziladi.