Krishtianu Ronalduning faoliyatidagi qora kunlar davom etmoqda. Uni jahon yulduziga aylantirgan "Manchester Yunayted" klubiga qaytishi uning faoliyati uchun ajoyib yakun bo‘lishi kerak edi. Lekin, aslida, Manchesterdagi kambek portugaliyalikka dahshatni eslatadi.
Erik ten Xagning bosh murabbiy bo‘lib kelishi bilan portugaliyalik daxlsiz bo‘lishni to‘xtatdi. U maydonda borgan sari o‘rinsiz bo‘lib bormoqda. Masalan, o‘tgan haftada "Liverpul"ga qarshi bo‘lib o‘tgan eng muhim uchrashuvda Ronaldu faqat so‘nggi 4 daqiqada maydonga tushdi. Superyulduz uchun bu xaqoratdek gam emasmi?
Buning bir qancha sabablari bor. Birinchidan, Krishtianuning o‘yin uslubi yuqori bosimni targ‘ib qiluvchi Ten Xagning taktik g‘oyalariga to‘g‘ri kelmaydi. Ronaldu esa allaqachon 90 daqiqa shu tarzda o‘ynashga bardosh bera olmaydi.
Ikkinchidan, portugaliyalikning o‘zi murabbiydan noroziligini bildirdi - u mashg‘ulotlarda qarorlarini muhokama qiladi, kiyim almashtirish xonasida uni ochiqchasiga tanqid qiladi. Qolaversa, Ronaldu jamoadan alohida yolg‘iz ovqatlanadi.
Kuni kecha Britaniya OAVlarida qiziqarli epizod paydo bo‘ldi. Ma’lum bo‘lishicha, “Brendford”ga 0:4 hisobida sharmandali mag‘lubiyatdan so‘ng Ten Xag butun jamoani to‘plagan, shunda har bir o‘yinchi o‘z fikrlarini bildirishi va inqirozdan chiqish yo‘li bo‘yicha o‘z qarashlarini taklif qilishi mumkin edi.
Ammo niderlandiyalik o‘zining nutqida klub rahbariyati uni to‘liq qo‘llab-quvvatlashini aytdi. Hatto u juda qattiq qarorlarini qabul qilsa ham. Ten Xag, shuningdek, uning obro‘siga salbiy ta’sir ko‘rsatadigan odamlarning jamoada bo‘lishiga yo‘l qo‘ymasligini aytdi.
Shundan so‘ng u butun jamoa oldida Ronalduga tanbeh berdi. Va unga hujumchi "Liverpul"ga qarshi o‘yinda asosiy tarkibga kirmasligini aytdi. Ronaldu bugungi “Sautgempton”ga qarshi bahsda ham asosiy tarkibga kiritilmadi.
Ronalduning o‘zi yig‘ilishda indamadi. Lekin u, albatta, xulosalar chiqardi. Agar shunday suhbatdan keyin ham Krishtianu Manchesterda qolsa, bu juda ajablanarli bo‘ladi. To‘g‘ri, yana bir muammo bor - Yevropaning hech bir top-klubi hali moliyaviy talablari juda yuqori bo‘lgan futbolchini qabul qilish istagini bildirmagan. Demak, Manchesterni tark etish bu juda katta tavakkal. Kamida olti oy jamoasiz qolish xavfi katta. Transfer oynasi yopilishigacha bo‘lgan vaqt esa qisqarib bormoqda.
