Yozgi transferlar davrida Pro liga ishtirokchilari ham o‘z tarkiblarini sezirarli darajada kuchaytirishdi. Ayrimlari hatto, legionerlar xizmatiga tayandi. Jumladan, «Yangiyer» klubi ham fursatdan foydalanib, tarkibini bosniyalik futbolchi - Sekuba Diatta bilan kuchaytirdi. Kelib chiqishi senegallik bo‘lgan Diatta mavsum yakuniga qadar «Yangiyer» klubi sharafini himoya qiladi. Xo‘sh, u Pro liga a’zosi  safiga qay tariqa kelib qo‘shildi? Maxsus muxbirimiz futbolchi bilan bog‘lanib, shu va boshqa mavzularda suhbatlashdi.

- Sekuba, keling, suhbatimizni debyutingizdan boshlasak. Ilk taassurotlar qanday?

- Jamoaga kelib qo‘shilganimga ko‘p vaqt bo‘lgani yo‘q. Aslida men jamoadagi debyut uchrashuvimni «Buxoro»ga qarshi bahsda o‘tkazishim kerak edi. Biroq hujjatlar bilan bog‘liq muammolar sabab, PFL tomonidan maydonga tushishimga ruxsat berilmadi. Natijada, «Zomin» bilan o‘yindagina imkoniyat berildi. Uchrashuvning ilk daqiqalaridan maydonga tushdim. Birinchi o‘yin uchun yomon emas, har holda. Qiyin bahs o‘tkazdik va yakunda muhim g‘alabani qo‘lga kiritdik. Qolaversa, «Zomin» klubi ham turnir jadvalida quyi o‘rinda borayotganiga qaramay, bizga yaxshigina qarshilik ko‘rsata oldi.

- «Yangiyer»ga kelib qo‘shilishingiz qay tariqa amalga oshdi?

- Barchasi oddiy. Agentlar aloqaga chiqqandim, O‘zbekis­ton Pro ligasining ishtirokchisi - «Yangiyer»dan taklif tushganini aytishdi. Barcha sharoitlarni o‘rganib chiqib, keyinchalik taklifga rozilik berdim. Qolaversa, menga ishonch bildirgan klub rahbari va bosh murabbiyi bilan ham suhbatlashdim. Hammasi meni to‘laqonli qoniqtirdi va kelishuv amal oshdi.

- Qancha muddatli shartnoma imzoladingiz?

- Mavsum yakuniga qadar mo‘ljallangan shartnomaga imzo chekdim. Agar barchasi yaxshi kechsa, kelishuv muddati yana bir mavsumga uzaytirilishi mumkin. Hammasi mening mavsum yakuniga qadar jamoa libosida nechta to‘p kiritishimga bog‘liq desam yanglishmagan bo‘laman.

- Moslashish jarayoni qanday kechmoqda?

- Barchasi ajoyib. Moslashib ketishimga jamoadoshlarimning hissasi katta bo‘lmoqda. Ular menga tushunmaganlarimni o‘rgatishmoqda. Til borasida biroz muammo bor, lekin jamoada ingliz tilida gaplashadigan futbolchilar ham yo‘q emas.

- Senegalda tug‘ilgansiz, lekin Bosniya fuqaroligiga egasiz...

- Ha, shunday. Men Senegalda tug‘ilganman. Futbolchi bo‘lish orzusida Yevropaga yo‘l olmasam bo‘lmasdi. Chunki o‘sha vaqtda mamlakatimizda kelajagingizni futbolga bog‘lamoqchi bo‘lsangiz, sharoit yaxshi emasdi. Natijada, 16 yoshimdayoq oilamni tark etib, Yevropaga yo‘l oldim. Hamon Bosniyada yashab kelyapman. Albatta, mamlakat fuqaroligini ham olganman.

- Faoliyatingiz davomida qaysi jamoalar safida to‘p surgansiz?

- Faoliyatim davomida asosan Yevropa mamlakatlarida o‘ynadim. Deylik, 19 yoshimda birinchi liga ishtirokchisi bilan professional shartnoma imzoladim. Keyinchalik Bosniya Superligasi klublarida to‘rt mavsum o‘ynadim. Shu vaqt oralig‘ida jamoa bilan Yevropa ligasi saralash bahsida ham o‘ynadim. So‘ngra Gresiyaga yo‘l olib, 5 yilimni u yerda o‘kazdim. Orada bir yil Kipr quyi ligasida ham o‘ynab ko‘rdim. Oxirgi yili Gresiya quyi ligasida to‘p surib, so‘ngra «Yangiyer» klubi bilan shartnoma imzoladim.

- Sir bo‘lmasa, «Yangiyer» sizga qancha maosh taklif qildi?

- Afsuski, buni ayta olmayman. Chunki shartnomada maoshimni oshkor qilmaslik sharti mavjud. Lekin shuni ayta olamanki, maoshim u qadar katta emas, lekin men Osiyoda futbol o‘ynashni anchadan beri orzu qilib kelardim. Nihoyat, bu amalga oshdi.

- Pro liga doirasida nech­ta gol urishni rejalashtirgansiz?

- Nechta bo‘lishini mavsum yakunida bilib olamiz. Lekin maqsadim, jamoa libosida ko‘proq gol urish. Bosh murabbiy bilan suhbatlashganimda, u aynan shunga urg‘u berdi. «Yangiyer»da yaxshi futbolchilar to‘plangan, faqat gol urishda oqsashmoqda. Aynan shu kamchilikni bartaraf etish uchun rahbariyat meni taklif qildi. Men esa ularning ishonchlarini oqlash uchun borimni berishga tayyorman.

IZZATBEK suhbatlashdi