O‘zbekiston professional futbol ligasi Diyor Imomxo‘jayev telegramdagi kanali orqali taniqli mutaxassis Alisher Nikimbayevning telegramdagi "post"iga javob qaytardi.

Avvalroq Nikimbayev quyidagi mazmunda xabar qoldirgandi:

"Mish-mishlarga qaraganda, Ispaniya futbol federasiyasi ispaniyalik murabbiylarga, toki O‘zbekistonda ishlash ikir-chikirlarini o‘rganmagancha, yurtimizda ishlashni taqiqlamoqchi.

Dastlab "Surxon" bosh murabbiyi zaxira o‘rindig‘ida planshetdan foydalangani uchun jarimaga tortildi.

Endi esa "Metallurg" bosh murabbiyi O‘zbekiston kubogi bahsining asosiy vaqtida foydalanilmagan o‘yinchi almashtirish imkoniyatidan nima uchun qo‘shimcha bo‘limlarda foydalana olmasligini tushunmayapti.

Ispaniyalik murabbiylar qiziq odamlar ekan. Yurtimizga kelib, barchasi o‘zlari ko‘nikkanidek bo‘lishini istashadi".

--------------------------------------------

Diyor Imomxo‘jayevning javobi esa quyidagicha bo‘ldi:

"Ham professional, ham ommaviy futbol yugur-yuguri bilan bo‘lib, ayrim masalalarga vaqt ajrata olmayapmiz. Quyidagi ikki masalada pozisiyamizni bildirishimiz kerak (kechroq bo‘lsa ham).

Tartib-intizom qo‘mitasi "Surxon" klubining ispaniyalik murabbiyini planshet ishlatgani uchun maydondan chetlatgani yo‘q. Futbolchilar harakatini masofadan turib tekshirishda as qotadigan planshet, noutbuk kabi vositalardan foydalanishda taqiq ham yo‘q. Ispaniyalik murabbiy planshet orqali uchrashuvni jonli efirda tomosha qilgan va har safar takroriy lavhalarni bosh hakamga ko‘rsatishga urinib, vaqtini zoye ketkazgan, keyinchalik qo‘pollashishni boshlagan. Qator tushuntirishlar samara bermagach, hakam uni maydondan chetlatgan. Chunki e’tiroz bu tariqa bildirilmaydi. Reglamentda hakamlar qaroriga shikoyat kiritish tartibi alohida tushuntirib o‘tilgan. Shunchaki ayrim kishilar planshet uchun qizil berdi deb yozdi va PFL yomonotliq qilinishi uchun sharoit yaratdi. Fitnachilar sizga faqat 1 ta rakursni ko‘rsatib, boshqasi yashiradi.  

"Metallurg"ning ispaniyalik bosh murabbiyi O‘zbekiston Coca-cola kubogidagi futbolchi almashtirish masalasiga e’tirozini bildirdi. Vaholanki, unga yil avvalida Reglament taqdim etilgan, shundan kelib chiqib, "Metallurg" taklif kiritishi mumkin edi (Luisma Ernandes yaqinda kelmadi, u o‘tgan yil ham klubda ishlagan). Shunchaki "Metallurg" kubokda mag‘lub bo‘ldi va musobaqa bilan xayrlashdi. Buni izohlashda eng oson yo‘l, Reglament yoki uchinchi tomonni savolga ro‘baro qilish. FIFA va uning nizomlarini, u hatto ispaniyalik bo‘lgan taqdirida ham, bizdan yaxshiroq bilmaydi (biz ham futbolchilarni shug‘ullantirishni undan yaxshiroq bilmaymiz, albatta). Mutaxassis chet elniki degani – uning daho ekanini anglatmaydi. PFL ochiq tashkilot, agar kelasi yil ham O‘zbekistonda ishlamoqchi bo‘lsa, takliflarini berishi mumkin. Uni o‘rganib chiqishga tayyormiz".