Holandning «Manchester Siti» o‘yinidagi anormallik kishini hayratga soladi.

Transfer sodir bo‘lganida, hujumchining Gvardiola sistemasida, ayniqsa, qisqa va o‘rtacha paslar bilan o‘ynashda muammolarga duch kelishi mumkinligi xavotirga solgandi.

Hozircha, bunga ehtiyoj ham yo‘qligi namoyon bo‘lmoqda. Pep unga maydonda shunday rol topdiki, hujumchi deyarli futbol «o‘ynamay» turib, o‘zining eng ustun jihatlari bilan natijaga xissa qo‘shmoqda.

Qarang, o‘tgan 5 o‘yinda Holand atigi 48 marotaba aniq pas uzatgan. Buning 21 tasi dastlabki turda va 6 tasi maydon markazidan to‘pni o‘yinga kiritish chog‘ida bo‘lganini e’tiborga olsak, keyingi 4 o‘yinda - 21 pas, o‘rtacha bir o‘yinga 5.25 dan (masalan, Harri Keynda 22, Holandning o‘zi Dortmunddagi so‘nggi mavsumida, 13.6) to‘g‘ri keladi. Gvardiola jamoasida!

Shu bilan birga Holand 5 o‘yinda 9 gol urdi va 1 assistni amalga oshirdi. 9 goldan 5 tasi darvozabon maydonidan, 1 tasi penaltidan. 2 tasi 4-5 metr masofadan zarba berib amalga oshirilgan.

Bir jurnalist aytganidek, go‘yoki vaziyat yaratishda dunyoning eng zo‘r jamoasi vaziyatlardan foydalanishda dunyoning eng zo‘r hujumchisi bilan birlashdi. Qo‘rqinchli, to‘g‘rimi?

Demak, Holand ochiq zonalarda, keng xududda, qarshi hujumlarda top darajada o‘zini namoyon qilgan bo‘lsa-da, Gvardiola uchun muhim emas - jarima maydoni ichida, kerakli paytda kerakli vaziyatni his qila olasizmi, Pep tizimi sizni katta bombardirga aylantira oladi.

«Sen futbol o‘ynashdan voz kechib, mening aytganimni qilasan, men seni rekordsmenga aylantiraman» — ajoyib taklif.

Yana bir fikr, esingizda bo‘lsa, Krishtianu Ronaldu o‘tgan yili «Manchester Siti»ga o‘tmoqchi bo‘lganda, ko‘pchilik Pep-Ronaldu juftligi u qadar samarali bo‘lmasligini taxmin qilgandi. Holandning Pep tizimidagi bugungi rolidan kelib chiqsak, aynan ronaldubop vazifa. Jarima maydoni ichida to‘pni qabul qilib, golga aylantirish bo‘yicha, Holanddan kam bo‘lmagan qaysi hujumchini bilasiz? Topdingiz...

Qahramon Aslanov.