“Andijon” jamoasi safarda “Mash’al” ustidan g‘alaba qozonganini yaxshi bilasiz.

Uchrashuvda hisobni ochgan Suhrob Berdiyev “Burgutlar” tarkibidagi ilk golini kiritdi. O‘yindan so‘ng u taassurotlari bilan o‘rtoqlashdi.

- “Mash’al”ga qarshi o‘yin haqida qanday fikr bildira olasiz?

- Xudoga shukr, g‘alaba qozondik. Yutib olingan o‘yindan har doim yaxshi xotiralar qoladi. Bu uchrashuvda qiyin bo‘lishini bilib turgandik. “Mash’al” yaxshi jamoa. Biz shunga yarasha tayyorgarlik ko‘rgandik. Hammasi joyida.

- “Andijon” safidagi ilk golingizni urdingiz va uni dadangizga bag‘ishladingiz...

- Hammadan ham ko‘proq dadam o‘yinimni kutadi. G‘alaba qozonishimizni doim duo qilib o‘tiradi. Bundan avval Kubok uchrashuvida AGMK bilan o‘ynadik va ushbu uchrashuvni ko‘rish uchun Andijonga ham keldilar. Jamoamizni stadionda qo‘llab-quvvatlab turdi. O‘sha o‘yinda bizga biroz omad yetishmagandi. Bu safar gol urib, jamoamni g‘alabasiga hissa qo‘shishni va bu orqali dadamni ham xursand qilishni maqsad qilgandim. Xudoga shukr, g‘alaba qozondik.

- Oldinda 10 sentyabr kuni Buxoroda mezbonlarga qarshi o‘yin bor. Qisqa fursat ichida tiklanish qiyin bo‘lmaydimi va bu uchrashuv oldidan nima deya olasiz?

- Albatta, bizni oldinda yana qiyin o‘yin kutib turibdi. “Buxoro”ga qarshi ham yaxshi o‘yin ko‘rsatishga harakat qilamiz. Buning uchun jiddiy tayyorlanamiz. To‘g‘ri, vaqt kam. Lekin shunga yarasha tayyorgarlik qilamiz. Murabbiylarning ko‘rsatmalarini to‘g‘ri bajarsak, hammasi yaxshi bo‘ladi.