Norvegiyaning Bryun shahrida «Manchester Siti» hujumchisi Erling Xoland sharafiga o‘rnatilgan yog‘och haykal yo‘qoldi.
Mamlakat OAV tarqatgan ma’lumotga qaraganda, og‘irligi deyarli 600 kilogrammga teng 3 metrli haykal 24 avgust kuni tag-tugi bilan qo‘porib olingan. Qiziq, Xolandning ulkan siymosi kimga kerak bo‘lib qoldi...? Axir u bronza yoki qandaydir qimmatbaho material emas, oddiy yog‘ochdan ishlangan...
Eng qizig‘i, o‘g‘rilar allaqachon shahar ma’muriyati bilan aloqaga chiqishdi. Yo‘q, ular haykal evaziga tovon puli talab qilishmadi yoki qandaydir shart qo‘yishmadi. Jinoyatchilar shunchaki, haykal uncha jozibali chiqmagani uchun uni o‘g‘irlab ketishganini ma’lum qilishdi. Oddiy aytganda, ularning iddaolariga ko‘ra, bu Erling Xolandning bugungi obraziga muvofiq emas va shaharning gavjum joyida turishi to‘g‘ri kelmaydi.
Mahalliy gazetalarda yozilishicha, odamlar 22 avgust kuni haykal oldida yuk mashinasini ko‘rishgan. Taxmin qilinishicha, o‘g‘rilar «Xoland»ni ayni shu mashinada olib ketishgan. Haykal joyiga qaytariladimi yoki yo‘q - hozircha bu haqda ma’lumot berilmadi.
