Ingliz klublari yoz davomida jami 1,9 milliard funtni transferlar uchun sarfladi. Ayni damda esa Buyuk Britaniya Qirolichasi olamdan o‘tgani sababli, APL bahslari vaqtincha qoldirilgan. Biz bugun ingliz klublari yozda xarid qilgan futbolchilardan tuzilgan ramziy terma jamoani e’tiboringizga havola etamiz.
Darvozabon – Nik Poup
Sobiq "Byornli" posboni o‘z klubi Chempionshipga yo‘l olgach, "Nyukasl" tomonidan sotib olingan edi. Poup kutilganidek, "qarg‘alar" darvozasini mustahkamlay oldi. Xususan, uning seyvlar ko‘rsatkichi Jordan Pikforddan keyingi, ikkinchi o‘rindan joy olgan.
O‘ng qanot himoyasi – Eron Xiki
Xiki o‘z faoliyatini chap qanotda boshlagan edi. Ammo "Brentford"ga o‘tgach, Tomas Frank uni o‘ngda sinab ko‘ra boshladi va bu ish berdi. Shotlandiya terma jamoasi a’zosi APLga tezda moslashib keta oldi. Uning starti ajoyib kechdi.
Markaziy himoya – Jeyms Tarkovski
1,9 milliard sarflanganiga qaramay, biz tekin transferlarni ham olishga qaror qildik. Tarkovski esa shunday transferga ega futbolchilardan biridir. Frenk Lempardga himoyada kerak kuchni aynan sobiq "Byornli" futbolchisi taqdim eta oldi.
Markaziy himoya – Bella-Kochap
Angliyadagi debyutini zo‘r o‘tkazgan yana bir futbolchilardan biri Armel Bella-Kochapdir. 20 yoshli himoyachi tezda o‘yin ritmiga moslasha oldi. U "Sautgempton" tarkibida porlay boshladi.
Chap qanot himoyasi – Oleksandr Zinchenko
Zinchenko o‘z faoliyatining "Manchester Siti"dagi qismida asosan rotasiyalarga uchragan edi. Gvardiola unga doim ham o‘ynash imkoniyatini taqdim etmagan. Ammo "Arsenal"da u asosiy tarkib futbolchisiga aylandi. Ukrain Londonda eng ijodkor futbolchilardan biridir.
Yarim himoyachi – Joau Palinya
"Fulxem" APLga ancha tetik bo‘lib qaytdi. Bunda jamoaning muhim transferlari ham katta rol o‘ynadi. Jamoa "Sporting"dan Palinyani sotib oldi. Bu esa Marko Silvaga katta yordam berdi. Uning shogirdlari hozirda jadvalning birinchi yarmidan joy olgan.
Yarim himoyachi – Eriksen
Daniyalik mayestro "Brentford"dan erkin agent sifatida "MYU"ga yo‘l olgandi. Ten Xag uni Brunu Fernandesh bilan birga, tandemda o‘ynata boshladi. Bu esa yaxshi natija berdi. Eriksenning endigi vazifasi tayanch himoyasida harakat qilishdir. Hozircha u buni yaxshi eplamoqda.
Yarim himoyachi – Romeo Laviya
18 yoshda bo‘lishiga qaramay, Laviya "Sautgempton"ning yarim himoyasida doimiy ko‘rinish bermoqda. Unga "Chelsi" ham qiziqish bildirgan edi. Laviya hozirning o‘zida 50 million funtga baholana boshladi.
Ӯng qanot – Luis Sinisterra
Sinisterra o‘tgan mavsumda "Feyenoord"ning kashfiyotiga aylangan. U Niderlandiyada jami 23 gol urishga erishgandi. "Lids Yunayted" kutib o‘tirmay, uni xarid qildi. Jessi Marsh jamoasi Sinisterra uchun qiyinlik qilmadi, futbolchi oson moslashdi. 23 yoshli hujumchi hozirgacha 2 ta gol urishga erishdi.
Chap qanot – Gabriel Jezus
Zinchenko kabi, Jezus ham Gvardiola jamoasida rotasiyalar qurboniga aylangandi. "Manchester Siti" safida Jezus ikki qanot yoki markaziy hujumda harakat qilavergan. Ammo unga doim ham imkon taqdim etilavermas edi. Mikel Arteta esa unga har bir o‘yinda ishonch bildirmoqda. Bu o‘z mevasini bermay qolmadi. U "Arsenal" safida 6 ta o‘yinda 6 ta gol urishga erishdi. Gabriel Jezus mavsum xaridi nomiga loyiq topilishi mumkin.
Markaziy hujum – Xoland
Yana kim ham bo‘lardi? Muxlislarning ko‘pi Xolandning APLga moslashib ketishiga qiynaladi deb o‘ylagandi. Ammo bu farazlar o‘zini oqlamadi. U "Manchester Siti" safida 6 ta o‘yinda 10 ta gol urdi va ayrim rekordlarni yangiladi. Agar Xoland shunday davom etsa, u "shaharliklar"ga ilk bor YECHL sovrinini taqdim etishi mumkin.
ISMATOV J.
