"Real Madrid" yarim himoyachisi Marko Asensio o‘ziga "Barselona" qiziqayotgani haqidagi ma’lumotlarga munosabat bildirdi. 26 yoshli ispaniyalikning "qaymoqranglilar" bilan shartnomasi kelasi yili yakuniga yetadi.
“Men hech narsa haqida o‘ylamagan edim. Bu men uchun muhim yil. Men hozirgi zamonda yashayman. Men ushbu oylarga e’tibor qaratmoqchiman, "Real Madrid"da bor kuchimni berib, terma jamoaga ajoyib jahon chempionati o‘tkazishiga yordam bermoqchiman. "Barsa"ga o‘tishmi? Men bor etiborimni bugungi kunga qaratganman va bor kuchimni terma jamoa va klubimga beraman. Men sizga javob bera olmayman. Bugun ertalab menda 200 ta xabar bor edi. Men mish-mishlar ko‘p bo‘lgan dunyoda yashayman. Bu normal holat, chunki yanvarda istalgan klub bilan shartnoma imzolashim mumkin. Biz nazorat qila olmaydigan vaziyatga tushib qoldik", - deydi Asensio.
Asensio joriy mavsumda to‘rtta o‘yinda maydonga tushdi, biroq jami atigi 47 daqiqa o‘ynadi. Transfermarkt portali Ispaniya terma jamoasi futbolchisining narxini 40 million yevroga baholamoqda.
