Superliga 20-turi markaziy to‘qnashuvida "Paxtakor" "Nasaf"ga qarshi Toshkentda o‘ynaydi.

Har ikki jamoa o‘rtasidagi to‘qnashuvlar oxirgi yillarda keskin o‘tmoqda. Har bir bahs muxlislarga shiddatli to‘qnashuvni taqdim etib keladi. Bu safargi o‘yin arafasida jamoalar bir xil ochko to‘plagan holda turnir jadvalida peshqadamlik qilishmoqda. G‘olib yakka peshqadamga aylanish imkoniyatiga ega bo‘ladi.

Bellashuvlar tarixiga nazar tashlaydigan bo‘lsak, chempionatlarda jamoalar jami 51 marta o‘zaro bahs olib borishgan. Ularning 30tasida "Paxtakor" zafar quchgan bo‘lsa, 11 bellashuvda durang natija qayd etilgan. Qarshiliklar esa 10 o‘yinda g‘alaba qozonishgan. Raqib darvozasini 78 bor ishg‘ol qilgan toshkentliklar darvozasidan 46 gol o‘tkazib yuborgan.

Toshkentdagi bellashuvlarda "sherlar" 20 g‘alaba, 3 durang va 1 mag‘lubiyat qayd etgan. "Nasaf" Toshkentda yagona yutug‘ini 2001 yil qo‘lga kiritgan. Oxirgi marta 2016 yil Qarshi jamoasi safarda ochkoga ega chiqqan. Toshkentdagi bahslarda "Paxtakor" 47 gol urib, 13 to‘p o‘tkazishgan.

"Paxtakor"va"Nasaf" jamoalari o‘rtasidagi bellashuv 2 oktyabr, yakshanba kuni «Paxtakor» stadionda soat 18:00da boshlanadi.