Malayziyaning "Kuala Lumpur Siti" klubi bosh murabbiyi Boyan Xodak OFK kubogi yarim final bosqichi doirasida bo‘lib o‘tadigan "So‘g‘diyona"ga qarshi o‘yin oldidan o‘z fikrlari bilan o‘rtoqlashdi.

"Musobaqadan avval o‘z oldimizga guruhdan chiqish vazifasini qo‘ygandik. Shuning uchun o‘yindan o‘yinga biz zavq olyapmiz. Bu safar ham yaxshi o‘yin ko‘rsatib, uchrashuvdan maroqlanishni istaymiz.

"So‘g‘diyona"ga qarshi o‘yinga yaxshi tayyorgarlik ko‘rdik. 39 yoshli Jasur Hasanov go‘yoki 19 yoshli futbolchidek o‘ynamoqda. Jamoa aksariyat xavfli vaziyatlarni uning qanotidan yuzaga keltirmoqda. U esa jamoaning eng yaxshi to‘purari hisoblanadi. Hasanov raqib jarima maydoni ichida juda xavfli o‘yinchi. Shuningdek, Marko Kolakovich havoda yaxshi harakat qiladi", — dedi Xodak.

15 yildan buyon Osiyo futbolida ishlayotgan xorvatiyalik mutaxassis jamoasi duch kelayotgan qiyinchiliklar borasida o‘z fikrini bildirib o‘tdi.

"Koviddan so‘ng ko‘p narsa o‘zgarib ketdi. Hozirda Kuala Lumpur va Toshkent o‘rtasida to‘g‘ridan-to‘g‘ri aviareyslar yo‘q. Shuning uchun Koreya orqali 28 soat parvoz qilishimizga to‘g‘ri keldi. Mamlakatlar o‘rtasidagi iqlim farq qiladi. Baxtimizga, O‘zbekistonda havo hali sovuq emas. Bu yerda havo juda quruq. Shunga qaramay, futbolchilar o‘yinga tayyor bo‘lishadi.

Boz ustiga, maydon ham yaxshi holatda emas. Shu bois, har ikki jamoa yaxshi o‘yin namoyish eta olishmaydi. Ertaga chiroyli o‘yin ko‘rsatishga hojat yo‘q. Barcha qaysi jamoa finalga chiqqanini eslab qoladi", — dedi Xodak.