O‘zbekiston o‘smirlar terma jamoasi Toshkentda o‘tkazilayotgan Osiyo chempionati saralash bosqichidan muvaffaqiyatli o‘tib, final bosqichi yo‘llanmasini qo‘lga kiritdi.

Jamoliddin Rahmatullayev jamoasi bugun Janubiy Koreya U17 termasiga qarshi prinsipial uchrashuvni o‘tkazdi hamda irodali g‘alabani qo‘lga kiritdi.

Birinchi bo‘limda koreyaliklar hisobni ochishgan bo‘lsa, vakillarimiz 71-daqiqaga kelibgina ilk marta raqib darvozasiga yo‘l topishdi. Ammo oradan ko‘p o‘tmasdan Koreya yana oldinga o‘tib oldi.

Vakillarimiz so‘nggi 10 daqiqada iroda namoyish etib, raqib darvozasini ikki marta ishg‘ol qilishdi va g‘alabani ilib ketishdi. Dastlab terma jamoamiz sardori Lazizbek Mirzayev jarima zarbasini chiroyli tarzda golga aylantirgan bo‘lsa, o‘yin so‘ngida Mamadalixon Olimov burchakdan yetkazilgan uzatmani darvozaga joylab qo‘ydi.

Shu tariqa, O‘zbekiston o‘smirlar terma jamoasi "J" saralash guruhidagi har ikki bahsni o‘z foydasiga hal etib, Osiyo chempionati yo‘llanmasini qo‘lga kiritdi.

OFK U17 chempionati, saralash
O‘zbekiston - Janubiy Koreya - 3:2 (0:1)
Gollar: Amirbek Saidov (71ʼ), Lazizbek Mirzayev (81ʼ), Mamadalixon Olimov (90) — Kang Minvu (26ʼ), Yu Byungheon (77ʼ)