«Lion»ga qaytgan Aleksandr Lakazett birdaniga katta tezlik oldi.

 Har holda, Liga 1ning 8ta o‘yinida 4ta gol - bu 31 yoshli faxriy uchun chakki statistika emas. Biroq «Lion»ning yangi sardori samaradorlik barobarida ko‘zda tutilmagan noodatiy muammoga ham yo‘liqdi.

Aleksandr Lakazett «Monako»ga qarshi o‘yindan so‘ng jurnalistlar oldiga chiqdi va savollarga o‘ta bo‘g‘iq ovozda javob berdi. Oqibatda futbolchi ijtimoiy tarmoqlarda kalaka ostida qoldi. Endi Aleksni ovozi tufayli Mikki Mausga qiyoslamoqdalar va undan imkon boricha tez-tez intervyu berishini so‘ramoqdalar. Lekin bo‘g‘iq ovozning sababi jiddiy va bu umuman kulgili holat emas. Lakazettda ovoz paychalari polipi bor. U shu tufayli FIFA kunlaridagi tanaffus vaqti jarrohlik stoliga yotadi. Aslida Lakazett bir necha oydan buyon odatiy ovoz chiqarolmay, qiynalayotgan ekan. Aytishlaricha, fransiyalik futbolchi mavsumning eng muhim pallasida yangi jamoasini murakkab ahvolda qoldirishni istamay, operasiyani sentyabr oyi oxiriga qoldirgan.

Polip nima? Bu bir yoki ikkala ovoz paychasining ustida rivojlanadigan xavfsiz o‘simta. Ushbu xastalikning aniq sabablari noma’lum, ammo shifokorlarning taxminlariga ko‘ra, bunga ko‘pincha chekish yoki ovoz to‘qimalarini haddan tashqari zo‘riqtirish sabab bo‘lishi mumkin. Xastalik belgilari ham oddiy - xirillash, yo‘talish, shuningdek, ovozning o‘zgarishi yoki bo‘g‘ilish. Polip - qo‘shni to‘qimalardan ajratib turadigan aniq qirrali qizil shakl. Ovoz to‘qimalarini davolashning bir necha usullari mavjud - jarrohlik, oddiy terapiya. Lakazett holatida esa birinchi variant zarur. E’tiborlisi, operasiyadan keyin bir necha kun davomida gapirmaslik talab etiladi.