“Roma”da to‘p surayotgan angliyalik himoyachi Kris Smolling Yevropa ligasi doirasida “Betis”ga (1:1) qarshi bo‘lib o‘tgan o‘yin haqidagi fikrlari bilan o‘rtoqlashdi.
“Ikkinchi bo‘limda birinchisiga qaraganda ancha yaxshi o‘ynadik. To‘p o‘tkazib yuborganimizda omadimiz kelmadi, ammo tan olishimiz kerakki, uchrashuvning birinchi yarmi biz uchun yaxshi o‘tmadi. Tanaffus vaqtida murabbiy to‘g‘ri so‘zlarni aytdi, shundan so‘ng biz ancha yaxshi o‘ynay boshladik va haqli ravishda bir ochkoga loyiq edik", - dedi Smolling UYEFA matbuot xizmatiga.
To‘rt tur natijasiga ko‘ra, Rim klubi to‘rt ochko jamg‘arib, uchinchi o‘rinda bormoqda. “Bo‘rilar” Yevropa ligasining navbatdagi o‘yinida XIK bilan kuch sinashadi.
