“Navbahor” hamda “So‘g‘diyona” (0:0 asosiy vaqt, 3:1 penaltilar seriyasi) o‘rtasidagi O‘zbekiston kubogi yarim final bahsidan so‘ng, jizzaxliklar ustozi Ulug‘bek Baqoyev Namangandagi atmosfera, jamoasi uchun har to‘rt kunda o‘ynash qiyin ekani va uchta frontda o‘ynash jamoaga qanday tajriba olib kelganini aytdi.

“Namanganda bunday ajoyib atmosferada o‘ynash yoqimli. Biz barcha qiyinchiliklar, qizil kartochka va yo‘qotishlar bilan ham bunday atmosferada bunday raqibga nisbatan tengma-teng o‘ynadik. Bugungi mardonavor o‘yin uchun futbolchilarga rahmat aytaman”, - deydi Baqoyev.

“Ochig‘i, uchta frontda uchrashuvlar o‘tkazdik va bu bizga juda katta qiyinchilik tug‘dirgani rost, ammo bu biz uchun katta tajriba ham bo‘ldi. Har to‘rt kunda o‘ynashga ko‘nikib ham qoldik. Futbolchilarning jarohatlari, jismoniy holatlarining yaxshi emasligi, ruhiy tomondan kamchiliklar kuzatilayotganiga shu omillar sababchidir deyish mumkin. Ikkita yarim finalda, yana penaltilar seriyasida yutqazganimiz juda alamli. Menimcha, futbolchilardagi ruhiy va jismoniy holatning yaxshi emasligi sababli, ikki marta ham bu seriyada yutqazdik”.

“Nima bo‘lgan taqdirda ham mavsum hali tugamadi. Biz kurashamiz. Barcha raqiblarni hurmat qilamiz, ammo hech kimdan qo‘rqmaymiz. Mavsumning qolgan o‘yinlarida yaxshi natija ko‘rsatishga harakat qilamiz”