«El-klasiko»dan bir kun o‘tib, ya’ni bugun Karim Benzemaga «Oltin to‘p» topshiriladi. Messi va Ronaldu davri boshlangandan so‘ng, endi boshqa yulduzlar ham borligini namoyish qiluvchi ilk futbolchi.

Ha, Modrich ham Oltin to‘p olgan, bilaman. Lekin tan olish kerak, jahon chempionatidagi Xorvatiyaning yurishi muhim rol o‘ynagan - eski odatga ko‘ra, mundiallar ovoz berishda tosh bosadi. Aslida o‘shanda Ronaldu «Real»da Modrich bilan birga YECHL yutgan bo‘lsa-da, terma jamoalar ishtirokidagi turnir nufuzi Modrichga qo‘shimcha ochko olib bergandi. Bir eslaganda, Luka o‘sha mavsumning tengsiz o‘yinchisi edi, deya olmaymiz, to‘g‘rimi? Kontekst bor xullas.

Karim Benzema haqida unaqa emas. Yakunlangan mavsumga nazar tashlaganimizda, har yerda Benzemani ko‘ramiz. Uning gollari, paslari, liderlik qobiliyati jamoasiga sovrinlarni olib keldi. Kecha esa, ovoz berganlarning qalbidagi so‘nggi shubhalarni tarqatib, «Barselona» darvozasiga gol ham urdi.

Uning bugungi sahnaga qay tariqa yetib kelganini eslasak, mukofot qadri yanayam oshadi. Axir u doim soyada bo‘lgan, doim muxlislar undan yaxshi variant borligini ta’kidlar, gollari emas, xatolari asosiy planga olib chiqilar, doim murabbiylar unga berilgan ishonchini jurnalistlar oldida oqlashga, Benzemaning foydali ekanini isbotlashga urinishardi. Hatto Karim top klubda o‘ynashga loyiq hujumchimi, degan savollar ham o‘rtaga tashlanardi.

Uning yonida to‘p surgan Krishtianu barcha to‘purarlik rekordlarini qayd etgani aynan Benzemaning harakatlariga ham bog‘liq ekaniga ko‘p e’tibor berilmagan.

O‘sha paytlari yozilgan quyidagi maqola ham aynan shu mulohazalar bilan yakunlangandi. Tahlillar biroz eskirgan bo‘lsa-da, o‘qib ko‘ring, zero bugungi kun qahramoni Karim Benzema ozgina vaqtingizga loyiq futbolchi.

Qahramon Aslanov.