«Эл-класико»дан бир кун ўтиб, яъни бугун Карим Бенземага «Олтин тўп» топширилади. Месси ва Роналду даври бошлангандан сўнг, энди бошқа юлдузлар ҳам борлигини намойиш қилувчи илк футболчи.

Ҳа, Модрич ҳам Олтин тўп олган, биламан. Лекин тан олиш керак, жаҳон чемпионатидаги Хорватиянинг юриши муҳим рол ўйнаган - эски одатга кўра, мундиаллар овоз беришда тош босади. Аслида ўшанда Роналду «Реал»да Модрич билан бирга ЕЧЛ ютган бўлса-да, терма жамоалар иштирокидаги турнир нуфузи Модричга қўшимча очко олиб берганди. Бир эслаганда, Лука ўша мавсумнинг тенгсиз ўйинчиси эди, дея олмаймиз, тўғрими? Контекст бор хуллас.

Карим Бензема ҳақида унақа эмас. Якунланган мавсумга назар ташлаганимизда, ҳар ерда Бенземани кўрамиз. Унинг голлари, паслари, лидерлик қобилияти жамоасига совринларни олиб келди. Кеча эса, овоз берганларнинг қалбидаги сўнгги шубҳаларни тарқатиб, «Барселона» дарвозасига гол ҳам урди.

Унинг бугунги саҳнага қай тариқа етиб келганини эсласак, мукофот қадри янаям ошади. Ахир у доим сояда бўлган, доим мухлислар ундан яхши вариант борлигини таъкидлар, голлари эмас, хатолари асосий планга олиб чиқилар, доим мураббийлар унга берилган ишончини журналистлар олдида оқлашга, Бенземанинг фойдали эканини исботлашга уринишарди. Ҳатто Карим топ клубда ўйнашга лойиқ ҳужумчими, деган саволлар ҳам ўртага ташланарди.

Унинг ёнида тўп сурган Криштиану барча тўпурарлик рекордларини қайд этгани айнан Бенземанинг ҳаракатларига ҳам боғлиқ эканига кўп эътибор берилмаган.

Ўша пайтлари ёзилган қуйидаги мақола ҳам айнан шу мулоҳазалар билан якунланганди. Таҳлиллар бироз эскирган бўлса-да, ўқиб кўринг, зеро бугунги кун қаҳрамони Карим Бензема озгина вақтингизга лойиқ футболчи.

Қаҳрамон Асланов.