«Manchester Yunayted» 6 kunda kuchli oltilikda turgan 3 jamoaga qarshi o‘ynadi va 5 ochko oldi. So‘nggi o‘yin eng qiyini bo‘lishi kutilgandi, hamda nafaqat raqib e’tibori bilan, jamoaning jismoniy holati tufayli ham.

Yaqinda ten Xag 10 kunda 4 uchrashuv kutib turganini va asosiy maqsad, futbolchilarning jismoniy tayyor bo‘lishiga erishish ekanini aytgandi. Ishonmang, chunki amalda unday emas, aslida murabbiy kattaroq vazifalar ustida ishlamoqda.

Masalan, «Nyukasl» bilan o‘yinda diskvalifikasiya tufayli, Maktominey o‘ynamasligi aniq edi, ammo ikki kun oldin «Omoniya» bilan oson o‘yinda u zaxirada qolib, Kazemiro to‘liq harakat qildi. Nega?

Chunki ten Xag ixtiyorida yangi futbolchilar bor, ayni pallada jamoaviy o‘yin, bog‘lamlar va ishlanmalarning amalda sinalishi jismoniy holatdan muhimroq. Agar jamoada poydevor o‘z vazifasini bajara boshlasa, keyin har qanday o‘zgarishlar, rotasiyalar og‘riqsiz kechaveradi.

Shu tomondan «Yunayted» qurilish jarayonining «Arsenal» yoki «Siti»dan ancha boshqa bosqichda turganini hisobga olish lozim. Har bir o‘yin nafaqat ochko uchun kurash, balki o‘sha jarayondagi bir qadam ham. U jamoalardagi o‘zgarishlar kimgadir dam berish, raqibga moslangan taktika, jismoniy forma uchun amalga oshsa, «Yunayted»da ba’zi futbolchilar o‘ynashi shart. Hozircha.

Kazemiro mana shu poydevorning muhim bo‘lagi. Qanchalik maydonga ko‘proq tushsa, adaptasiya shunchalik tez sodir bo‘ladi.

«Chelsi» bilan o‘yinning ikkinchi taymida mezbonlar biroz tetikroq ko‘rinishdi. Sababi ma’lum, birinchidan, uch kun oldin Brentfordda Potter ba’zi futbolchilarga dam berib, bugungi o‘yinga tayyorlangandi. Ikkinchidan, zaxirada aynan «Chelsi»da turli manevrlar uchun variantlar ko‘p edi - Xavers, Pulishich, Broya, Ziyesh... «MYU»da esa, Garnacho, Elanga, Ikbal, Pelistri kabi futbolchilar jami bo‘lib ham hali sanoqli daqiqalarda o‘ynashdi xolos. Ten Xag yoshlarga ishonmasligidan emas, aynan o‘sha sabab, avval jamoa poydevori qurib olinishi kerak. Jismoniy holat, B planlar haqida keyin qayg‘uriladi.

Yevropa Ligasi ham bor paytda, bu holat tez-tez pand berishi turgan gap, qo‘shilaman, lekin mana shu o‘n kunlik Kazemironing chinakam «MYU» futbolchisiga aylanish jarayoni uchun qurbon qilingan deb hisoblasak ham, ramziy ma’noda zo‘r yakunlandi-a, nima dedingiz?

Qahramon Aslanov.