Superliga 23-turidan o‘rin olgan “Paxtakor” – “Lokomotiv” (2:0) o‘yinidan so‘ng mezbonlar ustozi Maksim Shaskix ikkinchi bo‘limda atayin mehmonlarga tashabbus berilgani, jamoaning mavsum oxirlaridagi jismoniy holati, “Lokomotiv”dan “Navbahor”ga qarshi bahsda ijobiy natija kutayotgani va so‘nggi o‘yinlarda ko‘p sariq kartochka olayotgan shogirdlari haqida gapirdi.

“Birinchi bo‘limda kerakli natijaga erishgandan so‘ng, ikkinchi taymda ongli ravishda raqibga tashabbusni berdik. Mavsum oxiri doim birinchi planga chiqadi”, deydi Shaskix.

“Jamoamizning jismoniy holati yaxshi. Shunchaki, natija borasida bosim bo‘lishi mumkin. Mavsum oxirida xato qilishga haqqimiz yo‘q. Turnir jadvalidan kelib chiqib, barcha raqibga birdek qaraymiz. Bizning o‘z taktikalarimiz, ishlanmalarimiz bor. Qisqa vaqt ichida futbolchilarga ko‘p narsani o‘rgata olmaymiz. 90 daqiqa pressing qilishning imkoni yo‘q. Takror aytaman, hozir hamma futbol o‘ynashni biladi. Hujum qilish, himoyalanishni o‘zlashtirishgan. Biz o‘zimiz qurgan taktika bilan o‘ynaymiz. Bugun o‘yinimizda muammo ko‘rmadim”.

“Hozirda “Lokomotiv” qiyin ahvolda. Ularning bunday katta kuch bilan hujumga tashlanishi tabiiy. Shu bois, “Lokomotiv”ning “Navbahor”ga qarshi ham bugungidek zo‘r o‘ynashiga ishonaman”.

“Hozir barcha jamoalarda ogohlantirishlar va chetlatishlar uchun sanksiyalar bor. Bizda ham futbolchilar bunday choralar bilan tanishib chiqishgan. Futbolchilarning bu kabi choralarga qanday reaksiya bildirishlari muhim. Bilasizmi, tartib-intizomning buzilishi mahoratga ham ta’sir o‘tkazadi. Agar raqibda 10 nafar yulduz futbolchi bo‘lsa, mening o‘rtamiyona jamoamda tartib ularnikidan yaxshiroq bo‘lsa, ularni mag‘lub etishim mumkin. Maydonda tartib yo‘qmi, bu – anarxiya. Ikrom Aliboyev futbolni sog‘ingani ko‘rinib turibdi. Qoida buzilmadi deb o‘ylab jahli chiqdi. Boshqa vaziyatlarda esa uning agressiyasini ko‘rmadim. Farruh Sayfiyev esa, so‘nggi vaqtlarda bunday ishlarni bajonidil qilayapti”.