"Barselona" futbolchilari Chempionlar ligasi guruh bosqichining 5-turidan o‘rin olgan "Inter" hamda "Viktoriya" (Plzen) jamoalari o‘rtasidagi o‘yinni birgalikda tomosha qilishadi, deb xabar beradi jurnalist Andrea Albets o‘zining tvitterida.
Manba bergan xabarga ko‘ra, jamoa bosh murabbiyi Xavi “Inter” – “Viktoriya” uchrashuvini kiyinish xonasida birga tomosha qilish uchun futbolchilardan “Bavariya” bilan o‘yin oldidan stadionga erta yetib kelishlarini so‘ragan.
Milanda bo‘lib o‘tadigan o‘yin natijasi "Barselona"ning Chempionlar ligasida o‘ynashni davom ettirish imkoniyatlarini belgilashi mumkin. Agar “Inter” o‘z maydonida Chexiya jamoasini mag‘lub etsa, kataloniyaliklar va “Bavariya” o‘rtasidagi o‘yin natijasi qanday bo‘lishidan qat’iy nazar, Xavi shogirdlari turnirning pley-off bosqichiga chiqa olmaydi.
"Inter" - "Viktoriya" (Plzen) uchrashuvi Toshkent vaqti bilan 21:45da boshlanadi. "Barselona" va "Bavariya" o‘rtasidagi o‘yinning boshlanishi Toshkent vaqti bilan 00:00ga belgilangan.
