Ispaniya terma jamoasi JCH-2022 oldidan 55 nafar futbolchidan iborat dastlabki kengaytirilgan tarkibni tayyorladi.
Jahon chempionati uchun yakuniy ro‘yxatga 26 nafar futbolchi kiritiladi. Murabbiy Luis Enrikening iltimosiga ko‘ra, dastlabki tarkib ochiqlanmaydi. Dastlabki ro‘yxatda har bir pozisiya uchun besh nafar futbolchi bor.
"Manchester Yunayted" darvozaboni David De Xea qaydnomada yo‘q, deya xabar beradi As. Qayd etilishicha, JCH-2022ga Unai Simon («Atletik»), Robert Sanches («Brayton») va Devid Rayya («Brentford») boradi. Ro‘yxatda Kepa Arrisabalaga («Chelsi») va David Soriya («Xetafe») bor, lekin katta ehtimol bilan ular JCH-2022ga bormaydi.
Muvaqqat tarkibdan Ansu Fati («Barselona»), jarohatlangan Mikel Oyarsabal («Real Sosyedad») va Jerar Moreno («Vilyarreal»), shuningdek, Niko Uilyams («Atletik»), Borxa Iglesias va Serxio Kanales (ikkalasi ham «Betis») o‘rin olgan.
"PSJ" himoyachisi Serxio Ramos dastlabki ro‘yxatga kiritilgan, biroq uning jahon chempionatining yakuniy tarkibiga kirish imkoniyati kam.
