Испания терма жамоаси ЖЧ-2022 олдидан 55 нафар футболчидан иборат дастлабки кенгайтирилган таркибни тайёрлади.

Жаҳон чемпионати учун якуний рўйхатга 26 нафар футболчи киритилади. Мураббий Луис Энрикенинг илтимосига кўра, дастлабки таркиб очиқланмайди. Дастлабки рўйхатда ҳар бир позиция учун беш нафар футболчи бор.

"Манчестер Юнайтед" дарвозабони Давид Де Хеа қайдномада йўқ, дея хабар беради As. Қайд этилишича, ЖЧ-2022га Унаи Симон («Атлетик»), Роберт Санчес («Брайтон») ва Девид Райя («Брентфорд») боради. Рўйхатда Кепа Аррисабалага («Челси») ва Давид Сория («Хетафе») бор, лекин катта эҳтимол билан улар ЖЧ-2022га бормайди.

Муваққат таркибдан Ансу Фати («Барселона»), жароҳатланган Микель Оярсабаль («Реал Сосьедад») ва Жерар Морено («Вильярреал»), шунингдек, Нико Уильямс («Атлетик»), Борха Иглесиас ва Серхио Каналес (иккаласи ҳам «Бетис») ўрин олган.

"ПСЖ" ҳимоячиси Серхио Рамос дастлабки рўйхатга киритилган, бироқ унинг жаҳон чемпионатининг якуний таркибига кириш имконияти кам.