"Manchester Siti" hujumchisi Erling Xolandning Angliya Premyer-ligasidagi so‘nggi rekordlari uning taxminiy qiymatiga katta ta’sir ko‘rsatdi.

Transfermarkt ma’lumotlariga ko‘ra, norvegiyalik futbolchi 20 million yevroga qimmatlashgan, hozir uning narxi 170 million yevroni tashkil etadi.

Bu esa ayni damda uni dunyodagi eng qimmat futbolchiga aylantiradi. Xoland bu ko‘rsatkich bo‘yicha «PSJ» hujumchisi Kilian Mbappeni ortda qoldirdi, uning narxi o‘zgarmadi - 160 million yevro.

"Real Madrid" vingeri Vinisius Junior uchinchi pog‘onada qoldi - 120 million yevro.

Joriy mavsumda Xoland klubi safida barcha musobaqalarda 16 ta o‘yinda maydonga tushdi. Norvegiyalik to‘purar hisobida 22 ta gol va 3 ta golli uzatma bor.