Fransiya terma jamoasi vakillari terma jamoa va Madridning “Real” klubi hujumlari yetakchisi Karim Benzemaning Avstraliyaga qarshi jahon chempionati guruh bosqichi 1-turi doirasidagi o‘yiniga qadar tiklana olishiga shubha qilishmoqda. Bu haqda Get French Football News xabar bermoqda.
34 yoshli Benzema 19 oktyabrdan beri “Real”ning Chempionlar Ligasi va La Ligadagi beshta o‘yinidan to‘rttasini o‘tkazib yubordi. U chap sonning mushaklarida muammolarga duch kelmoqda va yaqindan boshlab umumiy guruhdan alohida mashg‘ulot o‘tkazmoqda.
Eslatib o‘tamiz, Fransiya jarohatlari tufayli N'Golo Kante (Chelsi) va Pol Pogba (Yuventus) xizmatlaridan foydalanmaydi. Rafael Varan (Manchester Yunayted)ning turnirdagi ishtiroki hamon so‘roq ostida.
Fransiya va Avstraliya o‘yini 22 noyabr kuni bo‘lib o‘tadi. Shuningdek, amaldagi jahon chempionlari bilan bir guruhdan Daniya va Tunis terma jamoalari joy oladi. Jahon chempionati 20 noyabrdan 18 dekabrga qadar bo‘lib o‘tadi.
