Франция терма жамоаси вакиллари терма жамоа ва Мадриднинг “Реал” клуби ҳужумлари етакчиси Карим Бенземанинг Австралияга қарши жаҳон чемпионати гуруҳ босқичи 1-тури доирасидаги ўйинига қадар тиклана олишига шубҳа қилишмоқда. Бу ҳақда Get French Football News хабар бермоқда.
34 ёшли Бензема 19 октябрдан бери “Реал”нинг Чемпионлар Лигаси ва Ла Лигадаги бешта ўйинидан тўрттасини ўтказиб юборди. У чап соннинг мушакларида муаммоларга дуч келмоқда ва яқиндан бошлаб умумий гуруҳдан алоҳида машғулот ўтказмоқда.
Эслатиб ўтамиз, Франция жароҳатлари туфайли Н'Голо Канте (Челси) ва Поль Погба (Ювентус) хизматларидан фойдаланмайди. Рафаэль Варан (Манчестер Юнайтед)нинг турнирдаги иштироки ҳамон сўроқ остида.
Франция ва Австралия ўйини 22 ноябрь куни бўлиб ўтади. Шунингдек, амалдаги жаҳон чемпионлари билан бир гуруҳдан Дания ва Тунис терма жамоалари жой олади. Жаҳон чемпионати 20 ноябрдан 18 декабрга қадар бўлиб ўтади.
