Guti "Real"da maydonga tushmayotgan Karim Benzemadan norozi.
34 yoshli hujumchi Madrid klubining chempionat doirasidagi 13 o‘yinidan 6 tasini o‘tkazib yuborgan. Kecha "Real" La Liganing 13-turi doirasida "Rayo Valyekano"ga imkoniyatni boy berib (2:3) turnir jadvalida peshqadamlikni qo‘ldan chiqardi. Hozir “Barselona” birinchi o‘rinda.
“Men uni tushunmayapman. Messi "PSJ"da, Levandovski esa "Barselona"da boshqa ko‘plab futbolchilar kabi o‘ynayapti. Jahon chempionati oldidan jarohat olish xavfi borligini tan olishimiz kerak. Lekin siz klubingizni tushkunlikka tushira olmaysiz.
Albatta, hech kim jahon chempionatini o‘tkazib yuborishni istamaydi, lekin klubni birinchi o‘ringa qo‘yish kerak", - deydi "Real"ning sobiq futbolchisi El Chiringuito telekanalida.
Bundan tashqari, Guti "Real"da Benzemaning o‘rnini bosa oladigan hujumchi yo‘qligidan noroziligini bildirdi.
“Bunday narsa yuz berishi mumkinligini hamma biladi. Men tushunmayapman, nega "Real" kabi klubning boshqa hujumchisi yo‘q", - deydi Guti.
Fransiyalik futbolchi joriy mavsumda “Real” safida 12 o‘yinda 6 ta gol urdi.
