«Barselona»ga qarshi bahsga o‘zining asosiy hujumchisi - Romelu Lukakusiz tayyorgarlik ko‘rgan «Inter» kichik hisob (1:0) bilan bo‘lsada, o‘z foydasiga hal qildi.

«Chelsi»dan qaytgan belgiyalik to‘purar avgust oyida jarohat olgach, «neradzurri»ning oldingi chiziqdagi yumushlari argentinalik Lautaro Martines va bosniyalik Edin Jekolar zimmasiga yuklandi. Ana shu juftlik hozirda o‘z vazifasini risoladagidek ado etmoqda.

36 yoshli Jeko - zamonaviy futboldagi eng yaxshi faxriylaridan biri. O‘tgan mavsumda Lukaku ketganidan keyin, u «Inter»ning asosiy hujumchisi bo‘lib qolgandi. Milanliklar uning belgiyalik monstr o‘rnini munosib to‘ldira olishiga shubhalanishdi. Biroq Edin ajoyib sermahsullikni namoyish etib, mavsumni 17ta gol va 10ta samarali uzatmani o‘z hisobiga rasmiylashtirish bilan nihoyasiga yetkazdi. Bundan tashqari, YECHLning guruh bos-qichi doirasidagi «Viktoriya»ga qarshi bahsda bittadan gol va assistni o‘z hisobiga yozib qo‘ydi.

Ayrimlar Jekoni allaqachon hisobdan chiqarib qo‘yishgan, faxriy o‘z faoliyatini Yaqin Sharq yoki MLSda yakunlashi taxmin qilingandi. Lekin Edin «A» seriyasidagi toplarga xos saviyani saqlagan va xalqaro arenada nufuzli turnirning keyingi bosqichlaridan umid uzmagan holda to‘p surmoqda. Faxriydagi metin iroda bolalik yillarida toblangan - u Bolqondagi urush dahshatlariga guvoh sifatida ulg‘aydi.

Serblar, bosniyaliklar va xorvatlar, pravoslavlar, musulmonlar va katoliklar yurti ulkan doshqozonga aylangan paytda Edin 6 yoshli bolakay edi. 1992 yilda Bosniya va Gersegovinada fuqarolar urushi boshlandi. Jekoning qadrdon shahri bo‘lgan Sarayevo ayniqsa, ko‘proq jabr ko‘rdi, uzoq vaqt davomida gazetalar sahifalaridan joy oldi. Urush tufayli shahar 25000 nafar fuqarolaridan bevaqt judo bo‘ldi, 35000 oila boshpanasiz qoldi. tabiiyki, Jekolar oilasi ham ana shu jabrdiydalar orasida edi.

«Bizning uyimizni vayron qilishdi. Shu sababli bobom va buvim bilan yashashga majbur bo‘lgandik. Jajjigina xonada 15 kishi yotardik. Buning ustiga, har kuni halok bo‘lgan tanishlarimiz haqida olingan xabarlar biz uchun kuchli ruhiy zarba bo‘lardi. Urushning azobi juda og‘ir. Ustimizga bombalar tushib turar, o‘q ovozlari tinmasdi. O‘sha kunlarda ko‘p yig‘laganman», - deya xotirlaydi Edin.

Jeko va uning oshna-og‘aynilari uchun futbol - urush davridagi yagona ovunchoq edi. Edinning otasi - Midxat professional futbolchi bo‘lib, o‘g‘lida keyinchalik o‘zining baxtli hayot kechirishiga sababchi bo‘ladigan futbolga bo‘lgan muhabbatni uyg‘otgandi. Ammo turmush o‘rtog‘i Belmaning onalarga xos sezgirligi bo‘lmaganida, Midxatning orzusi ro‘yobga chiqmagan bo‘lardi. Taqdir taqozosi bilan, nimadandir xavotirga tushgan Belma o‘rtoqlari bilan to‘p tepib yurgan Edinga barvaqtroq uyga qaytishini tayinlagan, o‘g‘li onaning maslahatini yerda qoldirmagandi. Oradan yarim soat vaqt o‘tar-o‘tmas, maydonchaga bomba tushdi - u yerdagi bolakaylarning birortasi ham tirik qolmadi.

«Yaratganning menga bergan onalik his,tuyg‘usi o‘g‘lim hayotini saqlab qoldi. Ko‘nglim falokatni avvaldan sezgandi», - deydi Belma dahshatli voqeani tilga olganida.

«Egulik qolmagan, doimo qo‘rqinch bilan yurardim. Shaharni bombardimon qilishgani sababli, har qadamimiz o‘lim bilan yonma-yon edi. Otam o‘shanda frontda, men esa har gal sirena tovushlarini titroq bilan eshitardim. Bu dahshatni, o‘sha urushni unuta olmayapman. Ko‘rgan-kechirganlarim butun hayotimga ta’sir etmoqda. Ko‘pchilik boshqa bolalar kabi, mening ham bolaligimni o‘g‘irlashdi», - deydi Edin.

Xayriyatki, Jekoning yaqin qarindoshlaridan hech kim o‘sha fojiali 3 yil ichida halok bo‘lmadi. Urush tugagach, otasi uni «Jeleznichar» klubining bolalar maktabiga olib bordi. Edinni mashg‘ulotlarga olib boradigan taksi haydovchisi shu jamoaning muxlisi edi va Jekodan yo‘lkira olmasdi. Bunga javoban bo‘lajak futbolchi yulduz maqomiga erishganida unga mashina sovg‘a qilishga va’da bergandi. Bir necha yildan keyin, u va’dani bajardi.

Oldinda esa Jekoni qiziqarli va yorqin faoliyat kutayotgandi - Feliks Magatning shafqatsiz mashg‘ulotlari va «Volfsburg» bilan Germaniya chempioni bo‘lishi, Serxio Aguero va Mario Balotelli bilan «Manchester Siti»dagi keskin raqobat, «Roma»dagi renessans va Joze Mourinyo bilan kelishmovchiliklar va «Inter»ga tashrif. Bolalik yillarida boshdan kechirgan dahshatli voqealar Jekoning tabiatiga kuchli ta’sir o‘tkazdi - u metin irodali jangchiga aylandi.

«Ayrim lahzalar bizni yanada kuchliroq bo‘lishga va hayotni chinakamiga qadrlashga o‘rgatdi. Biz oiladagi o‘zaro muloqotlar chog‘ida uni eslamaymiz. Doimo o‘tmishga nazar tashlashda ma’no ko‘rmaganman. Urush bizni o‘zgartirdi, o‘zgacha tarbiyaladi. O‘z hayoting, oila a’zolaring hayoti uchun qo‘rquvda yashash oldida, futboldagi muammolar fil qarshisidagi pashshachalik emas».

Ravshan IBROHIM tayyorladi